နှစ်ဆယ့်ငါး

အဆုံးမရှိ အစမရှိ ဦးတည်ရာမရှိ ဘာမှမရှိတာကို တစ်ခါရေးပြီး တော်တော်သဘောကျသွားတယ်..
သေချာ စဉ်းစားစရာမလိုဘဲ နေ့လည် ထမင်းစားချိန်မှာဖြစ်ဖြစ် အလုပ်လုပ်ရင်း ကွန်ပျူတာကြည့်ရတာ မျက်စိညောင်းလာရင်ဖြစ်ဖြစ် (ဘလော့ရေးတော့ ကွန်ပျူတာကြည့်ရတာ မျက်စိမညောင်းရှာဘူးထင်ပါရဲ့နော် ) .. ရတဲ့အချိန်လေးမှာ စိတ်ထဲရှိရာ အတွေးထဲမြင်ရာ အကုန် ရေးချင်တာရေးလိုက်ရသလို ဖြစ်သွားတာမို့ ဘောင်ခတ်မထားဘဲ လွတ်လွတ်လပ်ရှိတာကို တော်တော်သဘာကျသွားတာ..

ထိုနေ့ ထိုအချိန် စိတ်ထဲမှာရှိနေတဲ့ ထိုထိုသောအကြောင်းအရာတွေကိုပါ မှတ်တမ်းတင်လိုက်သလို ဖြစ်သွားပြန်တယ် တွေးမိပါတယ်..
အကြောင်းအရာ အတည်တကျ မယ်မယ်ရရမရှိတော့ ခေါင်းစဉ်တပ်ရ ခက်သွားတယ်..

နောက်ပြီး စိတ်ထဲပေါ်ရာ အမြန်အဆန်ရေးပြီး ရတဲ့အချိန်မှာ ပို့စ်တင်လိုက်တာမို့ စာကြောင်းအကျအန မြန်မာစာအထားအသို ၀ါကျတည်ဆောက်ပုံ တွေကို စိတ်တိုင်းကျ ပြင်ဆင်မွမ်းမံနေချိန်တော့ မရဘူးပေ့ါလေ..

အခုလောလောဆယ်တွေးမိနေတာက ကျမ အသက် အစိတ်တုန်းကနဲ့.. ကျမရဲ့ လုပ်ဖော်ကိုင်ဖက် ကောင်လေး (ဂျို) အသက် အစိတ်.. အသက် အစိတ်ချင်းတူပေမယ့် ကျမ အသက်အစိတ်တုန်းက လောကကိုမြင်ပုံ..တွေးခေါ်စဉ်းစားပုံ..ရယ် ဂျို ရဲ့ အသက်အစိတ် အတွေးအမြင်တွေရယ် အတော်ကွာတာကိုပါ..

အခု သူ့အသက်အစိတ်မှာ သူနဲ့သူ့ကောင်မလေးတို့ ငါးသိန်းတန်အိမ်တစ်လုံးကို ၀ယ်နိုင်ကြပြီ.. (ငါးသိန်းစလုံး တစ်ခါထဲ ပေးစရာမလိုပေမယ့် ငါးသိန်းတန်ဝယ်တဲ့အတွက် သတ်မှတ်ထားတဲ့ အရစ်ကျလစဉ်ငွေကို ပေးဆပ်နိုင်တဲ့ တာဝန်ကိုယူနိုင်သည်အထိ ၀င်ငွေရှိနေပါပြီ..) သို့သော် သူ့မှာ ဘွဲ့လက်မှတ်မရှိပါ.. ဘွဲ့ယူဖို့လဲ လောလောဆယ် အစီအစဉ်မရှိသေးပါလို့ ဆိုပါတယ်.. မိဘချမ်းသာသော်ငြား ဆယ်ကျော်သက်အရွယ်မှာ အလုပ်စလုပ်ပြီး ငွေ စ တင် စုဆောင်းခဲ့တယ်.. အလုပ်လုပ်ရင်း အလုပ်ကရတဲ့ ၀င်ငွေနဲ့ .. ဆောက်လုပ်ရေးပညာရပ်ဆိုင်ရာ အသက်မွေးလက်မှတ်တစ်ခု ယူထားတယ်.. ကျောင်းစရိတ်ကို မိဘဆီက မတောင်းပါ.. နောက်ပြီး လူကြီးလူငယ် မည်သူနဲ့မဆို အလုပ်သဘောဖြစ်စေ.. အလုပ်သဘောနဲ့ မသက်ဆိုင်သည် ဖြစ်စေ ကောင်းမွန်သင့်တင့်စွာ ပေါင်းတတ်ပါတယ်.. အခုအချက်တွေက အကြမ်းဖျဉ်းအပေါ်ယံ ထင်သာမြင်သာတဲ့ အကြောင်းအရာ အကျဉ်းရုံးပါပဲ...

ကျမ အသက်အစိတ်မှာ ကိုယ်ပိုင် မြန်မာငွေ ငါးသိန်း လက်ထဲမှာ မရှိပါဘူး.. အသက် အစိတ်ပြည့်၇န် တစ်နှစ်အလိုမှာမှ ဘီကွမ်းလေးတစ်လုံး ရရှာပါတယ်.. (၉၅မှာ ဆယ်တန်းအောင်သော်ငြား .. ၉၆မှာ စီးပွားရေးကျောင်းတော်ကြီးကို လှိုင်မှာ လ အနည်းငယ်တက်ပြီးနောက် ကျောင်းပိတ်သွား.. ၂၀၀၀မှာမှ တာဝမှာ လ အနည်းငယ်တက်..နောက် တောက်လျှောက် ရွာသာကြီးမှာ တက်လိုက်တာ ၂၀၀၃ခုနှစ်မှာ ဘွဲ့ရလေသတည်းပေါ့လေ..) ကျမလည်း အသက် ၁၆နှစ် ကနေ တောက်လျှောက် အလုပ်လုပ်ခဲ့သူပါ.. (တစ်ချက်တော့ တူလို့ တော်ပါသေးတယ်..) အဝေးသင်မတက်သော်ငြား ကျောင်းနဲ့အလုပ်နဲ့ မျှပြီး (သို့) ကျောင်းကို အနည်းငယ် လစ်ပြီး လုပ်သက်ကလေးလည်းရအောင်.. လုပ်ငန်းအတွေ့အကြုံရအောင်..အလုပ်ကမထွက်ဘဲ ဘွဲ့ရနိုင်အောင် အားအနည်းငယ် စိုက်ထုတ်ခဲ့ဖူးပါတယ်.. (အတန်းခေါ်ချိန်မပြည့်လို့ ပါချုပ်နဲ့ သွားတွေ့ခဲ့ရသူ စာရင်းထဲမှာတော့ ပါသွားတာပေ့ါလေ..)

အသက် ၂၅နှစ်အရွယ် ပြည်ပထွက်ချိန်မှာ အသက်သာ အစိတ်.. ကလေးစိတ်က မပျောက်ခဲ့ပါဘူး.. ကိုယ့်ကိုယ်ကို တော်တော်ငယ်သေးတယ်ပဲ ထင်ခဲ့မိတယ်ဆိုတာ ၀န်ခံပါတယ်....

တဖြည်းဖြည်းနဲ့ သိခဲ့ရတာကတော့.. မိမိကိုယ်ကို အားကိုးစီမံခန့်ခွဲနိုင်ခြင်း ဆိုတဲ့ အတတ်ပညာကို ဘယ်သူကမှ သင်မပေးဘူး ဆိုတာပါပဲ..
မိဘ(သို့)အုပ်ထိန်းသူကို အသက်အနည်းငယ်ကြီးရင့်သည်အထိ မီခိုနေသူများ (မိဘနဲ့အတူနေပြီး မိဘကို လုပ်ကျွေးပြုစုနေသူများကို မဆိုလိုပါ..).. အသက်အရွယ်အသင့်အတင့်ကြီးလာသည်အထိ ဘ၀ဆိုင်ရာ ဆုံးဖြတ်ချက်တစ်ခုခု ချဖို့ရာ မိဘ (သို့) အုပ်ထိန်းသူကို အမြဲအားကိုးနေရသူများ (တိုင်ပင်တာနဲ့ အားကိုးတာ မတူပြန်ပါဘူး..) အနေနဲ့
လူအများနဲ့ ပေါင်းသင်းဆက်ဆံရမှာ ရင့်ကျက်ခြင်း..
ကိုယ်တိုင် မှန်ကန်တဲ့ ဆုံးဖြတ်ချက် အလွယ်တကူ ချနိုင်ခြင်း - စတာတွေမှာ အားနည်းတတ်တယ်လို့.. ထင်မိပါတယ်..
အားကိုးတာနဲ့ လေးစားတာ အတိုင်းအတာတစ်ခုအထိ အတော်ကွာတယ်ထင်မိတာပါပဲ..

မိဘတွေအနေနဲ့လည်း သားသမီးကို - ချစ်တာလဲချစ်.. သူတို့ဘ၀ကို သူတို့ဘာသာ သူတို့အားကိုးပြီး ကြုံလာရတဲ့ ဘ၀တစ်ခုကို ပျော်ရွင်နေတတ်စေဖို့အတွက် မှန်ကန်တဲ့ ပြုစုပျိုးထောင်မှုနဲ့ လမ်းကြောင်းလေးတွေ ညွန်ပြပေးဖို့ လိုမယ် ထင်မိတာပါပဲ..

မိမိကလေး အသက်အစိတ် သုံးဆယ် တိုင်အောင် မိဘအိမ်မှာနေ.. မိဘအိမ်မှာ စားရုံမက.. စာသင်စရိတ်လဲ မိဘဆီက လက်ဖြန့်တောင်း.. ကျန်တဲ့ အသုံးစရိတ်တွေလဲ လွယ်လင့်တကူ ထုတ်ပေးနေရင်ဖြင့် ကိုယ့်ကလေးကို တစ်သက်လုံး အရွယ်မရောက်စေချင်သလို နှစ် ရာ ကျသွားမယ် ထင်မိပါတယ်.. (တတ်နိုင်တဲ့ မိဘနဲ့ ထိုမိဘများရဲ့ သည်းသည်းလှုပ် ရင်နှစ်သည်းချာများကတော့ ဖတ်မိရင်.. ရယ်စရာအဖြစ် ထင်မှတ်နေမလား မပြောတတ်ပါ..)

စကားမစပ်စွာ ပြောရရင်ဖြင့် - တစ်နေ့က ဖွင့်ထားမိတဲ့ ကိုကြီးနော်ကိုကြီး ဇာတ်လမ်းထဲက မင်းသမီးလိုဘ၀မျိုးကို ဆယ်ကျော်သက်အရွယ်လောက်တုန်းက ကြည့်ဖြစ်ရင် ငါလဲ သူ့လိုဖြစ်ချင်လိုက်တာ.. မိဘတွေကလဲ ချမ်းသာ.. ကျောင်းပြီးသွားပြီး ဘာမှအလုပ်လုပ်စရာလဲ မလို.. မိဘအိမ်မှာနေပြီး အသင့်စားသောက်.. စသည်ဖြင့် တွေးချင်တွေးမိပေမယ့် အခုကြည့်မိတဲ့အခါ.. မင်းသမီးရဲ့ အတော်ရေပေါ်ဆီနိုင်တဲ့ဘ၀ကိုကြည့်ပြီး အားကျဖို့ ဝေးစွ.. မိဘသာချမ်းသာပြီး ကိုယ်ကိုယ်တိုင်တော့ ဘာမှအဖြစ်မရှိသူပါလား - လို့ တွေးမိလိုက်ပါသေးတယ်.. (ရန်ကုန်က ဆယ်ကျော်သက်အရွယ်တူမလေး သာ ထိုကား ကြည့်ဖြစ်ရင် ခမျာ အားကျနေရှာမလား မတွေးတတ်ပါ....)

လုပ်ဖော်ကိုင်ဖက်ကောင်လေးရဲ့ အသက်အစိတ်နဲ့ ကိုယ့်တုန်းက အသက်အစိတ် ယှဉ်ကြည့်ရင်း.. ကိုယ်ကိုယ်တိုင် အသက်အစိတ်မှာ ငါ အတော်မရင့်ကျက်ခဲ့တာပါလားလို့ တွေးမိရင်း ရေးချဖြစ်သွားတာတွေပါ.. ကိုယ့်အမြင်သက်သက်တွေမို့ သေချာပေါက် မှားကောင်းမှားနိုင်ပါတယ်..

..

Worth reading if you are a parent and if you have some time - Why French Parents Are Superior    (and please don't forget to read comments.)

pN

Read more...

အဆုံးမရှိ၊ အစမရှိ၊ ဦးတည်ရာမရှိ၊ ဘာဆို ဘာမှမရှိသော စာကြောင်းများ။

ခုရက်ပိုင်း အတော်ကို အလုပ်များတယ်။ ရုံးအလုပ်၊ အိမ်အလုပ် စုံကလုံစိနေတာပဲ။
အလုပ်မရခင်တုန်းက အလုပ်တစ်ခုခု ရရင်တော့၊ အလုပ်ထဲမှာ စာလေးနည်းနည်းပါးပါးရေးနိုင်လိမ့်မယ်လို့ ထင်ခဲ့မိတာ။
ဘာဖြစ်လို့ အဲဒီလို ထင်ခဲ့မိတာလဲဆိုတော့၊ ဒီဘလော့ပေါ်မှာတင်ခဲ့ဖူးတဲ့ စာအများစုကို ရုံးအလုပ်စားပွဲမှာ ထိုင်နေရင်း ရေးဖြစ်ခဲ့လို့ပါ။
ယူအေအီးမှာ အလုပ်လုပ်တုန်းက အလုပ်ထဲရောက်ရင် (အလုပ်နဲ့မဆိုင်တဲ့) စာအတော်များများ ဖတ်ဖို့အချိန်ရတယ်၊ (အလုပ်နဲ့မဆိုင်တဲ့) စာအတော်များများ ရေးဖို့အချိန်ရတယ်။ ပေးအပ်တဲ့အလုပ်ကိုလဲ တာဝန်ကျေပွန်အောင် ထမ်းဆောင်နိုင်ခဲ့သေးလို့ လုပ်သက်တစ်နှစ်ခွဲအတွင်း လစာ သုံးခါ တိုးတာတွေဘာတွေတောင် ကြုံခဲ့ဖူးသေးတယ်။ အခု ဒီမှာတော့ (အလုပ်နဲ့မဆိုင်တဲ့) ဘာစာမှ မရေး၊မဖတ်တာတောင် ရုံးချိန်အတွင်းမှာ အလုပ်ပြီးအောင် မနည်းစီမံခန့်ခွဲနေရတယ်။ သိသာတဲ့အချက်က - ယူအေအီး (ဒူဘိုင်း)မှာ ယေဘုယျအားဖြင့် ၀န်ထမ်း ငါးယောက်လုပ် လုပ်တဲ့ စီမံကိန်းတစ်ခုကို ဒီမှာ တစ်ယောက်ထဲ လုပ်ခိုင်းသလိုမျိုး ဖြစ်နေသပေါ့လေ။ ဒူဘိုင်းတုန်းက စားပွဲမှာထိုင်နေရင် ဖုန်းလေးတစ်ချက်ခေါ်လိုက်တာနဲ့ ကော်ဖီဖျော်ပြီး စားပွဲပေါ် လာပို့ပေးမယ့် အော့ဖစ်စ်ဘွိုင်းတို့၊ ဒီစာကို ဒီလိုအိတ်ထဲ ဒီလိုလေးပိတ်ပြီး ဟိုနားက စားပွဲကို ပို့ပေးမယ့် ရုံးအကူတို့၊ ဟိုနားက ဒီနားသွားတာကို လိုက်မောင်းပို့ပေးမယ့် ဒရိုင်ဘာတို့ ဘာတို့တောင် ရှိသေးတာပေါ့နော်။

ဒီမှာတော့ အစကနေ အဆုံး ကိုယ့်ဘာသာကိုယ်သာ သိမ်းကြုံးလုပ်ပါ။ မန်နေဂျာမက၊ မန်နေဂျာ့ မန်နေဂျာ ဖြစ်နေပါစေ၊ ကိုယ့်ကော်ဖီခွက်လေး ကိုယ်ဖျော်လို့၊ ကိုယ်အားကိုယ်ကိုး ခွက်ကိုင်တိုး ပါပဲ။
အိမ်း ဒီလို ပြောကြေးဆို၊ ဒူဘိုင်းနဲ့ ဗန်ကူဗား ရတဲ့လစာတော့ ကွာမှာပေ့ါလို့ တွေးမိကြမလားပဲ။
ဆိုတော့ကာ၊ ကိုယ့်လို မန်နေဂျာလယ်ဗယ် မဟုတ်တဲ့ ၀န်ထမ်းမျိုးအတွက်တော့ အနည်းငယ်မဆိုစလောက် ကွာတယ်လို့ ပြောလို့ရမှာပေ့ါ။ ဒါပေမဲ့ အခွန်ရှိတယ်။
ဒူဘိုင်းတုန်းက ဥပမာ- လစာ တစ်ထောင် ဆိုပါစို့၊ ကိုယ့်အိတ်ထဲ တစ်ထောင်စလုံးဝင်တယ်။ ဒီမှာတော့ လစာတစ်ထောင်ဆိုရင် နေတဲ့ ပြည်နယ်ပေါ်မူတည်ပြီး အခွန်ဆောင်ပေးလိုက်ပြီးသကာလ၊ ကျန်သရွေ့ဟာ ကိုယ့်ဟာပါပဲ။ တစ်နှစ်လုံး ပေးထားလိုက်ရတဲ့ အခွန်တွေ၊ တစ်နှစ်တစ်ခါ ပြန်တောင်းခွင့်ရှိပေမယ့်၊ ပေးလိုက်ရတာတုန်းက တင်းတောင်းနဲ့  ၊ ပြန်ရတော့ နို့ဆီဗူးခွက်ပိန်နဲ့လို့ ပြောရမလိုပါ။
ဒါလဲ ရတဲ့ဝင်ငွေ အနည်းအများပေါ်မူတည်ပြီး ပြန်ရကြတာ ကွာပါတယ်လေလို့ အစိုးရဘက်က ရှေ့နေ့လိုက်ပြောရင်၊ ရပါတယ်။

http://www.cra-arc.gc.ca/tx/bsnss/tpcs/pyrll/t4032/jn12/bc-gnrlnf4032.pdf

အစောနက မန်နေဂျာရဲ့ မန်နေဂျာလဲ ကိုယ်တိုင်ဖျော်သောက် ဂလောက်ဂလောက် ပါပဲလို့ ပြောလိုက်မိပြီး သတိရမိသွားတာ၊ ဟိုတလောကက အစိုးရဌာနရဲ့ အကြီးအကဲတွေ ရုံးမှာ အစည်းအဝေးလာတက်တော့လဲ သူတို့ဘာသာသူတို့ ဖျော်သောက်ကြတာ တွေ့တာပါပဲ။
ဒါနဲ့ပတ်သတ်ပြီး မြန်မာပြည်တုန်းက ကြုံတွေ့ခဲ့ဖူးတဲ့ အစိုးရလူကြီးမင်းများနဲ့ အတော်ကွာတာကို သတိရမိလိုက်သေးတယ်။
မြန်မာပြည်တုန်းက စီမံကိန်းတစ်ခု ဖွင့်ပွဲလုပ်တော့ အစိုးရဘက်က စစ်ဘက်နယ်ဘက် အကြီးအကဲလူကြီးမင်းများ လာရောက်မယ့်နေ့များဆို အတော်အလုပ်ရှူပ်တာကို သတိရမိတာပါ။ နောက်ပြီး အစားအသောက်ဆိုလဲ သူတို့စားပြီးမှ ကိုယ်တို့ရုံးက ၀န်ထမ်းတွေ စားကြရတာ။ နောက်ပြီး လက်ဆောင်ပေးဖို့လဲ သေချာစနစ်တကျ ထုပ်ပိုးပြင်ဆင်ကြရသေးတယ်။ [ဟိုတလောက အကျဉ်းကျပ်ထဲက လွတ်လာတဲ့] ဗိုလ်ချုပ်ကြီး လာကြည့်မယ့်နေ့က သူ့ကို တည်ခင်းမယ့် အစားအစာကို အဆိပ်ကင်းမကင်း၊ သူမစားခင် အရင်စစ်ဆေးကြတာကိုတောင် မှတ်မိလိုက်သေးတယ်။
ဒီမှာတော့ နိုင်ငံ့အကြီးအကဲ ရုံးကိုလာတာ မကြုံဖူးသေးပေမယ့်၊ အစိုးရဘက်က ရာထူးအလွန်ကြီးသော အကြီးအကဲများ လာကြတဲ့အခါ အလုပ်သဘောအရ သက်ဆိုင်တဲ့ သူက လွဲရင် ဘယ်သူမှ၊ ဘာမှတောင် မသိလိုက်ရပါဘူး။
အစိုးရဆိုလို့ ( သိပ်တော့ မဆိုင်ပေမယ့် ) ဟိုတလောက အကယ်ဒမီပေးပွဲမှာ - "လေးစားရပါသော အကြီးအကဲ ဦး ____ အား အကယ်ဒမီပေးပွဲ ဖွင့်ပေးပါရန် ရိုသေလေးစားစွာ ပန်ကြားအပ်ပါသည် " လို့ - ကြားလိုက်ရတော့ တို့နိုင်ငံက လူများဟာ အလွန်တရာ လေးစားတတ်ကြတာ လေးစားဂုဏ်ယူဖွယ် ကောင်းလှပါလားလို့ တစ်လေးတစား တွေးလိုက်မိသေးတယ်။

အကယ်ဒမီပေးပွဲဆိုလို့ ခုတလော အိမ်မှာ တီဗွီကေဘယ်လ်ဖြတ်ထားတော့ မြန်မာရုပ်ရှင်ဗွီဒီယို တစ်ချို့ကြည့်ဖြစ်တယ်။ ဒီလို ကြည့်မိတဲ့အခါ သတိထားမိတဲ့တစ်ချက်က တဖြန်းဖြန်းနဲ့ ပါးချကြတာကိုပါ။ ဂျပန်ကြီးက မြန်မာမလေးကို ပါးချတာ အမျိုးထိမချိအောင် နာတတ်တဲ့ အခံစိတ်လေးနဲ့မို့ စိတ်သဘောမကျတာ အမှန်ပါ။
သို့သော် ကြည့်မိတဲ့ (သို့မဟုတ် ဖွင့်ထားပြီး မကြည့်ဖြစ်သော်ငြား ဇာတ်လမ်းပမာ နားဆင်သလို၊ အသံကို နားထောင်နေမိတဲ့ ) ကားတစ်ချို့အနက်က ကတ်ကတ်လန် ဆိုတာမှာလဲ ပါးချလိုက်တာပဲ။ နောက်ပြီး နှင်းဆီစီးချင်း ဆိုတာမှာလဲ ပါးချလိုက်ကြတာ၊ ဖြန်းကနဲ ဖြန်းကနဲပါပဲ။ တစ်ခြား ဘယ်ကားတွေမှာ ဒီလိုပဲ ကြုံရင်ကြုံသလို ပါးချကြလဲ လိုက်မမီတော့ပါဘူး။
နောက်ပြီး ဒီကားတွေကို ကြည့်ရှူသူကို အသက်အကန့်မထားဘဲ ထုတ်ဝေတဲ့အခါ၊ မြန်မာကလေးငယ်တွေ အသက်အရွယ် အကြီးအငယ် မရွေး ကြည့်ကြတော့ ၊ ''ပါးချခြင်း'' ဟာ ပြသနာတစ်ခုကို ဖြေရှင်းရာနည်းလမ်းပါလားလို့ လေးနှစ် ငါးနှစ်အရွယ်ကလေးတွေ ထင်သွားမှာ စိုးရိမ်လိုက်မိသေးတယ်။
ဒါပေမဲ့လဲ လေးစားစရာကောင်းတဲ့ မြန်မာတွေဟာ တစ်ယောက်နဲ့တစ်ယောက် အလွန် လေးစားဖွယ်ကောင်းလောက်အောင် လေးစားကြတာမို့ ဒါဟာ ထင်သလောက်လဲ စိုးရိမ်စရာမရှိလောက်ပါဘူးလို့  ဖြေတွေးလိုက်မိပါတယ်။
ဂျပန်ကြီးက မြန်မာကားတွေ ကြည့်ပြီး ဒီလိုလုပ်ဖို့ အကြံဥာဏ်ရတာပါ၊ ဒီလိုလုပ်တာ ဒီနိုင်ငံမှာ အလွယ်တကူပဲ ခွင့်ပြုတယ် ထင်လို့ပါ လို့ မပြောလောက်ပါဘူး လို့ တွေးမိပါတယ်။

www.youtube.com/watch?v=JR_eRxvq4xk

ဒါပါပဲလေနော်။ အစ မရှိခဲ့သလို၊ အဆုံးလည်း မရှိပါ။ ဦးတည်ရာမရှိ၊ ဘာဆို ဘာမှမရှိသော စာကြောင်းတစ်ချို့ပါပဲ။     ။  




.

Read more...

တွေးတဲ့အခါ သတိရပါ

''ဘယ်သွားမလို့လဲ... ''
လှေကားပေါ်မှ တက်ကြွစွာ ဆင်းလာသည့် ဆယ်ကျော်သက်ရွယ် ကလေးမလေးကိုကြည့်ပြီး သူမ မေးခွန်းထုတ်လိုက်မိသည်။

''ဒီနေ့ ဘာနေ့လဲ သိလား....၊ အဲ.. မေ့နေပြီ မဟုတ်လား..။
ဒီနေ့ ဗယ်လင်တိုင်းနေ့လေ။
ဒီနေ့ ဗယ်လင်တိုင်းနေ့၊ မနေ့က မြန်မာပြည်ရဲ့ ဗိုလ်ချုပ်မွေးနေ့၊ တစ်နေ့က မြန်မာပြည်ရဲ့ ပြည်ထောင်စုနေ့။ မမေ့ဘူးနော်။ အားလုံးကို မှတ်မိပါတယ်။ ခု.. သူငယ်ချင်းနဲ့ ညစာသွားစားမလို့ပါ။"

ချစ်သူများနေ့ ရောက်ကာနီးတိုင်း သူမ ပြောလေ့ရှိသည်များကို၊ ကလေးမက သူမပြောခင် ဦးအောင် ပြောပြီး ရယ်ကျဲကျဲဖြင့် အပြင်သို့ ထွက်သွားလေသည်။

ဗယ်လင်တိုင်းနေ့။ ချစ်သူများနေ့။

"မမေ့ပါဘူး..အေရယ်..။ သိပ်ကို မှတ်မိတာပေ့ါ..။" -
စိတ်ထဲက ရေရွတ်လိုက်သည်။

-----------------------------

ချစ်သူများနေ့ကို ငယ်စဉ်ကလေးဘ၀က တစ်ခါမှ မကြားဖူးခဲ့။ ဆယ်ကျော်သက်အရွယ်မှာပင် မသိခဲ့။
ငယ်စဉ်ကလေးဘ၀နဲ့ ဆယ်ကျော်သက်အရွယ်မှာ လုံးဝ မကြားဖူးခဲ့တာ ရန်ကုန်မှာ မနေဘဲ နယ်မှာအနေများခဲ့လို့လား.. သေချာမသိပါ။
၁၉၉၄-၁၉၉၅၊ ၉တန်း-၁၀တန်းအရွယ်မှာ ချစ်သူများနေ့ သီချင်းခွေထွက်ရာက စပြီး သိခဲ့သလိုပင်။

နောက်ပြီး ချစ်သူများနေ့ရောက်တိုင်း ရင်နှင့်အမျှ ချစ်ရဖူးသူတစ်ယောက်ထံမှ တန်ဖိုးအနည်းအများ အဓိကမဟုတ်ဘဲ၊ အမှတ်တရ ချစ်လက်ဆောင်တစ်ခုခု လိုချင်ခဲ့မိဖူးသည် ကို သတိရမိသည်။
ချစ်သူများနေ့တွင် စကားလေးတစ်ခွန်းကို ထပ်ခါတစ်လဲလဲ ကြားချင်စိတ်ဖြင့် အချိန်ကာလတစ်ခုကို အရူးအမူး တောင့်တခဲ့ဖူးသည်။
တကယ်တော့ ချစ်သူများနေ့ဆိုတာ သတ်မှတ်ချက်တစ်ခုခုသာ ဖြစ်ကြောင်း နားလည်သဘောပေါက်သော်လည်း၊ အသိအမှတ်ပြုမှု တစ်ခုခုကို လိုချင်ခဲ့မိသည်မှာ သူ့ကို ချစ်ရလွန်းသောကြောင့်သာ ဖြစ်ခဲ့သည်။
'တကယ်တော့ စီးပွားရေးသမားတွေအတွက် ထွင်ထားသလို သက်သက်ပါပဲကွာ..' - ဟု သူငယ်ချင်းတစ်ယောက်ပြောဖူးသည်ကိုလည်း အမှတ်ရမိသည်။

ဘာပဲဖြစ်ဖြစ်ပါလေ၊ တစ်ခုသော ချစ်သူများနေ့တွင် စိတ်ဓာတ်ပျော့ညံ့လွန်းလှသော သူမသည် မျက်ရည်စက်လက်ဖြင့် ငိုကြွေးနေခဲ့ဖူးသည်။

အတိတ်ဆီကို လွမ်းမောစွာ တွေးနေစဉ်တွင်ပင်၊ အိမ်ရှေ့တွင် ကားရပ်သံနှင့်အတူ ကားတံခါးပိတ်သံကြားလိုက်ရသဖြင့် တံခါးမဆီသို့ ထွက်လာခဲ့လိုက်မိသည်။

"ဟင် အကျီ င်္မလဲရသေးဘူးလား။ ဒီနေ့ ဘာနေ့လဲ သိလား။ မေ့နေပြီလား။"

"မမေ့ပါဘူး။ ဗယ်လင်တိုင်းနေ့လေ..။"

"ဟာ မဟုတ်သေးပါဘူး။ အမေကတော့ လုပ်ပြီ ။ ဆရာဝန်ကို ဒီအကြောင်းသွားပြောရင် အမေ့ကို သူငယ်ပြန်နေပြီလား ဆိုပြီး ဆရာဝန်က စ အုံးမယ်။ ဒါနဲ့ .. အမေ့ မြေးမရော။"

"ခုနကပဲ အပြင်ထွက်သွားတယ်။ လွတ်လွတ်လပ်လပ် သွားပါစေဟယ်။"

"အင်း ကောင်းလေစွ။ ဒီမြေးနဲ့ ဒီအဘွားနဲ့ပဲ လိုက်တယ်။ အမေ ဒူးခေါင်းနာနာနေတယ်ဆိုလို့.. ဆရာဝန်နဲ့ ပြဖို့ ချိန်းထားလို့ သမီးရုံးက စောပြန်လာတာ။
မေ့နေပြန်ပြီလား.. အမေရယ်.. ဒီလိုမှန်းသိ သမီး ဖုန်းအရင်ခေါ်ပြီး သတိပေးပါတယ်။"

"မမေ့ပါဘူး..အေရယ်..။ သိပ်ကို မှတ်မိတာပေ့ါ..။ အတွေးလွန်သွားလို့ပါဟယ်..။" -
စိတ်ထဲက ရေရွတ်လိုက်မိပြန်တော့သည်။ ။


ပန်းနွယ်
၂၀၁၂-၀၂-၁၄


တိမ်စတွေကြွေ မိုးရေတဲ့လား



.

Read more...

ရင်ထဲမှာတော့ T.T.A

ရန်ကုန်မြို့၏ နွေတစ်နေ့။ နေက ပူသည်။ ချွေးက ထွက်သည်။ ကားက ကျပ်သည်။ ကောင်မလေးက ချစ်စရာကောင်းသည်။

ဤဘတ်စကားပေါ်တွင် ထိုင်ခုံရ၍သာ သူ ထိုင်လိုက်ခဲ့ရသော်လည်း မတ်တပ်ရပ်နေသော မိန်းကလေးများကို တွေ့ရသောအခါတိုင်း၊ ထိုင်ခုံတွင် မိန့်မိန့်ကြီး ထိုင်နေရသည်ကို စိတ်မလုံ။ ထ ပေးပြန်လျှင်လည်း အများအမြင်တွင်လည်းကောင်း၊ ထိုအမျိုးသမီးကလေးများ၏ အမြင်တွင်လည်းကောင်း ဖွန်ကြောင်သူ ဟု အထင်ခံရဦးမည်။

ယခု သူ့နဘေးတွင် ရပ်နေသော ကောင်မလေးက ချစ်စရာ အတော်တော့ ကောင်းသည်။
ရေသူမ စကတ် ဟု ခေါ်သော စကတ်အရှည်ကြီးနှင့် အကျီ င်္အဖြူ ကိုယ်ကျပ်ကလေး ၀တ်ထားသည်။ ဆလင်းဘတ်အိတ်ကို လွယ်ထားပြီး လက်တစ်ဘက်က စာအုပ်များကို ပိုက်ထားကာ ထမင်းချိုင့်ကိုင်ထားသော ကျန်လက်တစ်ဘက်ဖြင့်ပင် ကားလက်ကိုင်တန်းကို ပူးလျက် လှမ်းကိုင်ထားသည်။
ကားယိုင်သွားတိုင်း သူ့ကိုယ်လေးက လိုက်ပြီး ယိုင်နေသည်။
ကောင်မလေးကို သူကြည့်မနေသော်လည်း မျက်လုံး၏ ထောင့်တစ်နေရာမှ သူ မြင်နေရသည်။

ကောင်မလေး တက်လာသော မှတ်တိုင်ကို သူ မသိလိုက်။
လှည်းတန်းအကျော်လောက်ရောက်မှသာ သူ့နား ရောက်လာသည်မှန်း သတိထားမိသည်။ လှည်းတန်းမရောက်ခင် မှတ်တိုင် တစ်ခုခုမှ တက်လာခြင်းဖြစ်ရမည်။

“ရှေ့မှာ အ၀ိုင်းဗျို့။ ကိုင်မထားရင် ယိုင်သွားမယ်။ ယိုင်သွားရင် ဒိုင်စားမယ်နော်..။ နီးစပ်ရာတွေကို ကိုင်ထားကြပါ...”

ကားစပယ်ရာက အော်သည်။ ထမင်းချိုင့်ကိုင်ရင်း တန်းကိုင်ထားသော မအားသောလက်ဖြင့်ပင် မျက်နှာပေါ်သို့ ကျလာသော ဆံပင်များကို သပ်တင်လိုက်သေးသည်။

သြော် ဒုက္ခ။ ဆင်းရဲခြင်းပါတကား။

သြော် သုခ။ ချစ်စရာကောင်းလှပါတကား။

“ဒီမှာ…. ညီမ ထမင်းချိုင့် ပေးထားမလား ။”
“ဟုတ်..ကျေးဇူးနော်..။”
“စာအုပ်တွေပါ ပေးရင် ပေးထားလေ...။”
“ဟုတ်..ကျေးဇူး...။”

စာအုပ်တွေကို အရင်လှမ်းသည်။
ထို့နောက် ထမင်းချိုင့်ကို လှမ်းသည်။
တုံးတိတိ လက်သည်းလေးများကို သတိထားမိသည်။
စာအုပ်က လယ်ဂျာစာအုပ်လိုမျိုး ခပ်ရှည်ရှည်။ စာအုပ်ထောင့်စွန်းတွင် နာမည်ထိုးထားသည်။

“T.T.A”

“တီ..တီ..အေ”

တီတီအေ ဆိုတော့ တင်တင်အေးပေါ့ လို့ တွေးမိသည်။ မဟုတ်လောက်သေးပါဘူး။ မုန့်ဟင်းခါးဆိုင်နာမည်တော့ မပေးလောက်ပါဘူး။
တင့်တင့်အေး ဖြစ်နိုင်သည်။ ဒါဆိုရင် မတင့်။
နောက် ဖြစ်နိုင်ချေ ရှိသေးတာက သွယ်သွယ်အောင် ၊ သင်းသင်းအောင်၊ သူသူ၊ သက်သက်။

တော်ပါပြီလေ။ တွေ့ကြုံဆုံရ ဘုံဘ၀၊ ခဏနေ ခွဲရတော့မှာပဲ။ မတွေးတော့ပါဘူး။

တူးတူး လဲ ဖြစ်နိုင်သေးတာပဲ။
သြော် မတွေးတော့ပါဘူးဆို။

“ဆင်းရတော့မယ်။ ကျေးဇူးပဲနော်။”
“အာ..ဟုတ်ကဲ့ခင်ဗျ”

သူမ ဆင်းတော့မည်။ ထမင်းချိုင့်နှင့် စာအုပ်များကို လှမ်းပေးလိုက်သည်။
ချစ်စ၇ာအတော်လေးကောင်းတဲ့ ကလေးမလေးပဲ။

“တီ..တီ..အေ”

သူ တိုးတိုး ရေရွတ်လိုက်သည်။ ကံကြုံရင် ပြန်ဆုံရအုံးမှာပေ့ါ တီတီအေလေးရယ်။

…။…


တီတီအေ ဆိုတဲ့ ကောင်မလေးနဲ့ ဆုံလိုက်ရတယ်။ သူဆင်းသွားတာက သံဈေး မှတ်တိုင်။ သူဆင်းသွားတော့ ကျွန်တော့် ရင်ခွင်ထဲမှာ ဆံနွယ်လေးတစ်ပင် ကျန်ခဲ့တယ်။ ထမင်းချိုင့်နဲ့ ငြိပြီး ကျန်ခဲ့တဲ့ တီတီအေလေး ဆံပင်ပဲ ဖြစ်မှာပါ။ ဆံနွယ်လေးကတောင် ချစ်စရာကောင်းနေခဲ့တယ်။


ဒိုင်ယာရီ စာအုပ်ထဲတွင် ချရေးလိုက်ပြီးနောက် သူ နှစ်နှစ်ခြိုက်ခြိုက် အိပ်ပျော်သွားသည်။ အိပ်မက်ထဲတွင် သူသည် တီတီအေ လေး နှင့် စကားတွေ ဖောင်ဖွဲ့လျက်။

…။…

ဟော သူတက်လာပြီ။ စံရိပ်ငြိမ် မှတ်တိုင်တွင် သူစီးလာသော လိုင်းကား အရပ်၊
ကောင်မလေး ကားပေါ်တက်လာသည်ကို တွေ့လိုက်ရတော့ ရင်တစ်ချက် ခုန်သွားသည်။
ငါ့နှယ်နော်၊ ဘာရင်ခုန်စရာ ရှိလို့လဲ။
ပြန်ထိန်းသော်လည်း မရတော့ပြီ။

ရင်သည် ခုန်လျက်၊ ထို့ကြောင့် ရင်ခုန်လျက်။

ဒီနေ့ ကောင်မလေးက သူ့ဘေးတွင် လာရပ်သည်မဟုတ်။
သို့သော် သူ့ဆီမှ ကြည့်လျှင် လှမ်းမြင်နေရသည်။ ကောင်မလေး ပိုက်ထားသော စာအုပ်များထဲတွင် သူ့ သူငယ်ချင်းတစ်ယောက် အလုပ်လုပ်နေသော ကွန်ပျူတာစင်တာ တစ်ခု၏ လိုဂိုကို တွေ့လိုက်ရသည်။
ကောင်မလေးက အဲဒီ့ကွန်ပျူတာ စင်တာမှာ သင်တန်းတက်နေတာလား။
အလုပ်လုပ်နေတာလား။
ကောင်မလေးက သံဈေးမှတ်တိုင်မှာတွင်ပင် ဆင်းသွားပြန်သည်။
ပတ်ဝန်းကျင်ကို ဂရုစိုက်သည့်ပုံ သိပ်မရှိ။ မျက်နှာလေးက ဖောင်းဖောင်းကလေးနှင့် စိတ်ကောက်နေသော ကလေးငယ်တစ်ယောက်၏ မျက်နှာလေးနှင့် ဆင်တူသည်။
တီတီအေလေးရယ်။

“ဒီနားမှာ ဒီကွန်ပျူတာ စင်တာ ရှိတာပဲ၊ အဲဒီမှာ အလုပ်လုပ်တာ ထင်တယ်။”

သတင်းထောက်တစ်ယောက်၏ အတွေးကို ခဏငှားကာ တွေးလိုက်မိသည်။

…။…

ဒီနေ့တော့ ကချင် ၀မ်းဆက်လေးနဲ့ပါလား။
သူ ဒီလမ်းတစ်လျှောက် လိုင်းကားစီးလာသည်မှာ ကြာပြီ။
ယခုလို ချစ်စရာကောင်းသော မိန်းကလေးများကိုတွေ့တိုင်း သူ မှတ်မှတ်ရရ ရှိတတ်သည်ကို ၀န်ခံပါသည်။
သို့သော် ယခု မိန်းကလေးကို အမှတ်ရဆုံး ဖြစ်နေမိချေပြီ။

ယနေ့ ကံကောင်းထောက်မစွာဖြင့် ကားက အရင်နေ့များကထက် ပိုကျပ်သည်။
ကောင်မလေးက သူ့ဘေးတွင် လာရပ်ချေ၏။

“စာအုပ်နဲ့ ထမင်းချိုင့်တွေ ပေးထားပါလား ညီမလေး...”
“ဟုတ်..ကျေးဇူး...။”

ညီမလေး ဟု ထည့်ခေါ်လိုက်မိသဖြင့် ကိုယ့်ကိုယ်ကို ကျေနပ်သွားသည်။
ဟိုနေ့ကလည်း တို့ ကူပြီးကိုင်ပေးသေးတယ်လေ။ မှတ်မိလားဟင်။ - ဟု စိတ်ထဲမှ မေးနေမိသည်။

ထို့နောက် စာအုပ်ပေါ်ရှိ နာမည်ကို မသိမသာဖြင့် ဝေ့ပြီး ကြည့်လိုက်ပြန်သည်။

T.T.A
Super Soft - Computer Training Centre

သေချာသွားပြီ။
ထိုကွန်ပျူတာ စင်တာတွင် သူ့သူငယ်ချင်းတစ်ယောက် အလုပ်လုပ်နေသည်။
မတွေ့သည်မှာ ကြာပြီမို့ ယခုမှ တွေ့ရန် မလွယ်။

ကြောင်လွန်းသည်ဟု အထင်ခံရမည် ဆိုးသောကြောင့် ဖုန်းဆက်ပြီး မေးရန် သိပ်မ၀ံ့သော်လည်း မေးမှ ဖြစ်တော့မည့် အခြေအနေမို့ မေးရချေတော့မည်။

ကောင်မလေးက သူ့နှလုံးသားအတွက် သိပ်ကို ချစ်စရာကောင်းနေသည်။
ဒီလိုသာ နေ့တိုင်းနီးပါး အလုပ်သွားတိုင်း မြင်တွေ့နေရမည် ဆိုလျှင် အနည်းဆုံး တရင်းတနှီး စကားပြောခွင့်လေးရမှ ဖြစ်မည်။

လုံ့လ ၊ ၀ီရိယ ရှိလှစွာဖြင့် ထိုကွန်ပျူတာ စင်တာတွင် အလုပ်လုပ်နေသော ထိုသူငယ်ချင်းကို ဖုန်းဆက်မေးတော့မည် ဟု ဆုံးဖြတ်ချက်ချလိုက်သည်။

…။…

“အေး ပြောကွာ။ ရပါတယ်။ ခဏနေမှ အတန်းဝင်စရာရှိတာ။ မင်းလဲ ပျောက်နေတာကြာပေါ့။ ကျောင်းပြီးကတည်းက ငါတို့ မတွေ့ဖြစ်ကြတော့ဘူး။”

“ဟိုတစ်ခါ တွေ့သေးတယ်လေကွာ။ မင်းသိန်း မင်္ဂလာဆောင်တုန်းက။ မင်းရော ဘယ်တော့ယူမှာလဲ။ သီတာနဲ့ပဲလား။”

“သီတာနဲ့ ပြတ်သွားတာ ကြာပြီကွ။ သူလဲ အပြင်ထွက်သွားပြီ။ သူကလဲ ပြန်မလာချင်ဘူး။ ငါကလဲ သူ့နောက် မလိုက်နိုင်ဘူး။”

“အေးကွာ၊ စိတ်မကောင်းပါဘူး။ ငါ မင်းဆီမှာ အခု အကူအညီ တစ်ခုလောက် တောင်းချင်လို့ပါ။”

စကားအပိုတွေ သိပ်ပြောမနေတော့ဘဲ သိချင်တာကို မေးမှဖြစ်တော့မည်။ သူ ရင်တွေ ခုန်လှပြီ။

“ပြောကွာ။ ရပါတယ်။ လုပ်ပေးနိုင်တာရှိ ကူညီရမှာပေ့ါ။”

“မင်းတို့ အလုပ်မှာကွာ နာမည်မှာ သွယ်တို့ တင်တို့ အဲ.. အဲလိုမျိုး ကွာ။
အင်္ဂလိပ်လို ပေါင်းရင် တီ နဲ့ စ တဲ့ ဟာမျိုး၊ သက်တို့ သင်းတို့။ အဲလို စာလုံးပါတဲ့ ကလေးမလေးတွေ ရှိလား။”

“တီ နဲ့ စတာ ..။ သန္တာ ဆိုတာပဲ ရှိတယ်ကွ။ ကျောင်းသူတွေထဲမှာဆိုရင်တော့ မသိဘူး။ အလုပ်ထဲမှာတော့ ကျန်တာ မရှိဘူး။ မသန္တာ ပဲရှိတယ်။ မင်း အသိလား။ ”

“သန္တာ.. သန္တာတဲ့လား။”

သူ ရင်တွေ အခုန်မြန်လာသည်။

“အဲဒီ မသန္တာရဲ့ နာမည်အရင်းက ဘာတဲ့လဲကွာ။ စိတ်မရှိပါနဲ့ ငထွန်းရာ။”

“ဟာ..မင်းကလဲ။ ရပါတယ်။ ဒီလောက်က ဘာမှမှ မဟုတ်တာ။ မသန္တာက ငါ့အထက်က မန်နေဂျာလေ။ မခင်သန္တာကျော်တဲ့။ မင်း အသိဖြစ်နေတာလား။”

သူ မောသွားသည်။

ဖုန်းခွက်ကို ကျစ်ကျစ်ပါအောင်ဆုပ်ရင်း - ဒါဖြင့် ကောင်မလေးက၊ တီတီအေလေးက အလုပ်ထဲက မဟုတ်ရင် သင်တန်းကျောင်းသူထဲကပေါ့။ ဒါဆိုရင် သိဖို့ ဘယ်လွယ်တော့မလဲ - လို့ တွေးမိရင်း စိတ်ဓာတ်ကျချင်သယောင်ဖြစ်သွားသည်။

မထူးပါဘူးလေ။ ပြောပြလိုက်တော့မည်။ တတ်နိုင်သလောက် အကူအညီ တောင်းကြည့်တော့မည်။

ချစ်ခြင်းတရားအတွက် ပေါ်ပေါက်လာသော သတ္တိများသည် သူ့ရင်ထဲတွင် အပြည့်။

“ဒီလိုကွာ။ မင်းတို့ဆီမှာ သင်တန်းလာတက်နေတာထင်တယ်။
ကောင်မလေးတစ်ယောက်ရှိတယ်ကွာ။ ချစ်စရာ အရမ်းကောင်းတယ်။ မျက်နှာ ဖောင်းဖောင်းလေးနဲ့ကွာ။ ငါနဲ့ ကားပေါ်မှာ ခဏခဏ ရှိပြီ ဆုံတာ။ ဒီနေ့လဲ ထပ်တွေ့သေးတယ်။
ငါ မနေနိုင်တော့လို့ မင်းဆီကများ နာမည်သိရမလားလို့ လှမ်းမေးတာ။ နေပါတော့ကွာ။
ကျေးဇူးပါပဲ။ ”

“ဒါနဲ့ ခုနက သင်းတို့ သက်တို့ ဆိုတာကျတော့ ဘယ်ကဘယ်လို သိတာလဲ။
ပြီးတော့ ဘယ်မှာနေတာလဲ.. မင်းသိလား။”

“စံရိပ်ငြိမ်မှာ နေတာ ထင်တယ်ကွ။”

“စံရိငြိမ်မှာ..လား”

သူ့သူငယ်ချင်းက သူ့နောက်မှ သံယောင်လိုက်သည်။

“အေး။ စံရိပ်ငြိမ်မှတ်တိုင်ကနေ တက်တက်လာတာကွာ။
စာအုပ်ထောင့်စွန်းမှာ တီတီအေ လို့ ရေးထားတာ တွေ့လို့ သင်းသင်းတို့ သက်သက်တို့ ဖြစ်နိုင်မလားလို့ ငါ့ဘာသာ တွေးကြည့်နေတာ။
ချစ်စရာလေးကွ။
မင်း သိမယ်ထင်တာပဲ။ တီတီအေ ဆိုတာ ဘယ်သူဖြစ်နိုင်မလဲ။ ပြီးတော့ ဒီနေ့ ကချင်ဝမ်းဆက်လေး ၀တ်ထားတယ်ကွာ..။”

သူ ဆွေးဆွေးမြေ့မြေ့လေး ပြောလိုက်သည်။

“သေပါတော့ကွာ..ထိန်လင်းအောင်ရာ။”

“အမ် ..ဘာဖြစ်လို့လဲ။”

“အဲဒါ ငါ့ကောင်မလေးကွ။ နှင်း ပါ။
ဒီအလုပ်ရောက်မှ စ တွေ့တာ။ ဒီနေ့ ထူးထူးခြားခြား ကချင်ဝမ်းဆက်လေး ၀တ်ထားတာ ဆိုလို့ ငါတို့ဆီမှာ နှင်းပဲ ရှိတယ်။”

“နှင်း..ဟုတ်လို့လား။ ငါပြောနေတဲ့ တစ်ယောက်က တီတီအေလို့ နာမည် အတိုကောက် ရေးထားတာပါ။”

လက်ကျန်မျှော်လင့်ချက်လေးဖြင့် သူ အထွန့်တက်လိုက်သည်။

“ထိန်လင်းကြောင်..မင်း ကျောင်းတုန်းက အတိုင်းပဲ လို့ ပြောရင် မင်း စိတ်ဆိုးအုံးမယ်။
တီတီအေ ဆိုတာ ငါ လေကွာ။
တင်ထွန်းအောင် လေကွာ..။
ငါ့ကောင်မလေးကို ကြိုက်သလို လေ့လာရအောင်.. ငါ့စာအုပ်တွေ ပေးထားတာလေ။
မင်းကို နောက်နေတာ မဟုတ်ပါဘူးကွာ။
ငါကွာ.. မင်း မိုလို့ပေ့ါကွာ..။”

…။…

ထိုညက သူ အိပ်မက် မက်သည်။ အိပ်မက်ထဲတွင် သူသည် တီတီအေ လေး နှင့် စကားတွေ ဖောင်ဖွဲ့လျက်။
သြော်..ရက်စက်လိုက်တဲ့ တီတီအေလေးရယ်။

ဟမ်.. မဟုတ်သေးပါဘူး..။
သြော်..နှင်းရယ်…။

… ။ ။ ။ …


ပန်းနွယ်

(၂၀၀၇ခုနှစ် ဧပြီလ ၂၆ရက်နေ့တွင် ဇာတိနွယ် အတွက် Apple-pie အမည်ဖြင့် ရေးခဲ့သည်ကို ပြန်လည်ဖြည့်စွက်ပြင်ဆင်သည်။)











.

Read more...

“ထုံထုံ” နှင့် “တို့.. သန်ရာ သန်ရာ”

မေလုံ ။ ။ ကင်ဂျုံအီ သေသွားပြီတဲ့နော်။ နင်.. အဲဒီ့သတင်းကြားပြီးပြီလား။

ရွှေထုံ။ ။ ဟင် မကြားရသေးပါဘူး။ ဘယ်သူလဲ... ဘယ်ကလဲ..။

မေလုံ ။ ။ နင်ကလဲ.. ။ တကယ်ပါပဲ...။ ကင်ဂျုံအီ ကို တောင် မသိဘူးလား။ ကိုရီးယားကလေ...။

ရွှေထုံ။ ။ ဟယ်..ဟုတ်လား..။ ဘယ်ကားမှာ ပါတဲ့ မင်းသားလဲ။ ငါက မင်းသားတွေရဲ့ နာမည်အရင်းတွေ မသိဘူးဟဲ့။ ဇာတ်လမ်းထဲက ဇာတ်ကောင်နာမည်တွေပဲ သိတာ။

မေလုံ ။ ။ ငါ့နှယ်..ရွှေထုံရယ်...။ သေလိုက်ပါတော့...ဟယ်။ ။



.

http://en.wikipedia.org/wiki/Kim_Jong-il
http://www.cnn.com/2011/12/18/world/asia/north-korea-leader-dead/index.html

.





ထုံထုံ:
ထုံထုံနှင့် “သူသေမှ မွေးမယ်”



.

Read more...