World Strongest Financial Markets:
ွGlobal Finance မှာ ဗြိတိန်နိုင်ငံက အမေရိကားကို ကျော်ပြီး နံပါတ်(၁) ဗိုလ်စွဲတယ်လို့ World Economic Forum က ကြော်ငြာတယ်။ ဗြိတိန်ပြီးတော့ သြစကြေးလျ၊ နောက် အမေရိကား၊ အမေရိကားနောက်မှာ စင်္ကာပူက ကပ်နေတယ်။
ကနေဒါတောင်မှ စင်္ကာပူနဲ့ ဟောင်ကောင်ပြီးမှ လာတယ်။
နိုင်ငံတစ်နိုင်ငံချင်းစီရဲ့ အားနည်းချက်နဲ့ အားသာချက်တို့ကို ဖော်ပြထားတာလည်း စိတ်ဝင်စားစရာကောင်းတယ်။
Ranking:
1. United Kingdom
2. Australia
3. United States
4. Singapore
5. Hong Kong
6. Canada
7. Switzerland
8. Netherlands
9. Japan
10. Denmark
11. France
12. Germany
13. Belgium
14. Sweden
15. Spain
16. Ireland
17. Norway
18. Austria
19. Finland
20. United Arab Emirates
21. Italy
22. Malaysia
23. South Korea
24. Saudi Arabia
25. Jordan
ထိပ်သီး ၂၅နိုင်ငံမှာ အနီက အာရှ၊ အစိမ်းက အရှေ့အလယ်ပိုင်း။ ကျန်တာ အနောက်နဲ့ ဥရောပနိုင်ငံများ။
တရုတ်က ၂၆၊ ထိုင်း ၃၅၊ အိန္ဒိယ ၃၈၊ ဖိလစ်ပိုင်က နံပါတ် ၅၀မှာ၊ ဘင်္ဂလားဒေ့ရ်ှတောင်မှ နံပါတ် ၅၄မှာ ချိတ်တယ်။
(မြန်မာလား..၊ မြန်မာနိုင်ငံကြီး မြန်မာ့နည်းမြန်မာ့ဟန်နဲ့ စီးပွားရေးတွေ ဒီလောက် ခိုင်မာဖွံ့ဖြိုးတိုးတက်နေတာ ကမ္ဘာကမှ မသိကြပဲလေ။)
အုပ်ချုပ်သူများ အရမ်းချမ်းသာတဲ့ အာဖရိကားက နိုင်ငံတစ်ချို့လဲ Financial Markets ခိုင်မာတဲ့အထဲမှာ မပါဘူး။
United Kingdom
Strengths: Insurance, M&A, securitization, size of banking system
Weaknesses: Financial stability, currency stability, bank efficiency
Australia
Strengths: Low sovereign debt, retail access to capital
Weaknesses: Bond market capitalization, commercial access to capital
Singapore
Strengths: Institutional and business environment, bank efficiency
Weaknesses: Public debt, disclosure of financial information
Canada
Strengths: Access to capital, banking stability
Weaknesses: Relatively weak legal rights and official supervisory powers
United Arab Emirates
Strengths: Stable banking system, favorable tax regime
Weaknesses: Risk of sovereign debt crisis, poor disclosure
(ယူအေအီးမှာ အခွန်မရှိဘူး။ မသိမသာ တစ်ခြားခေါင်းစဉ်အောက်ကနေပြီး ကောက်နေတာတွေတော့ရှိတယ်။ အခွန်လို့ ခေါင်းစဉ်တပ်မထားဘူး။ ၀င်ငွေခွန်၊ ယူအေအီး အစိုးရကို ပေးစရာမလိုဘူး။ ဥပမာ- လစာ ၃၀၀၀ ဆို၊ အဲဒါ အသားတင်ပဲ။ ပစ္စည်းဝယ်လည်း ၃ဒါဟမ် ဆို ၃ ဒါဟမ် ပဲ ပေးရတယ်။ ဘာပဲဖြစ်ဖြစ် စိတ်ချမ်းသာစရာကောင်းတယ်။)
South Korea
Strengths: Human capital, insurance
Weaknesses: Commercial and retail credit access
(NTM = Notes to Myself)
source: http://www.businessweek.com/
Oct 30, 2009
NTM: World Strongest Financial Markets
Oct 26, 2009
သမီးနာမည် "အင်ကြင်းမေ" ပါ။
(ရေးသူ - မယဉ်ယဉ်ငြိမ်း)
သာသနာ့ရောင်ခြည်ဘုန်းတော်ကြီးသင်ပညာရေးကျောင်းဟာ ချောက်မြို့နယ် စလေမြို့မှာ တည်ရှိပါတယ်။ ၂၀၀၁ခုနှစ်တွင် စတင်တည်ထောင်ခဲ့ခြင်းဖြစ်သည်။ စလေမြို့တွင် အစိုးရပညာသင်ကျောင်း ၄ကျောင်းတည်ရှိသောလည်း ထိုကျောင်းများတွင် ပညာမသင်ကြားနိုင်သော ကလေးငယ် ၃၅ယောက်အား ပညာသင်ကြားပေးရာမှ စတင်ခဲ့ခြင်းဖြစ်သည်။
ယခုအခါတွင် ကျောင်းသားဦးရေ ၈၀ထိရှိလာပြီဖြစ်ပြီး ဆရာဆရာမငါးဦးဖြင့် ပညာသင်ကြားပေးလျှက်ရှိသည်။ သာသနာ့ရောင်ခြည်ဘုန်းတော်ကြီးသင်ကျောင်းသည် ကျောင်းအနေဖြင့် ရှေးဟောင်းကျောင်းတစ်ခုဖြစ်သည့်အပြင် နရပတိစည်သူမင်းလက်ထက်က စာတိုက်တော်များ ရှေးဟောင်းစာပေပရပိုက်များရှိခြင်းကြောင့် နိုင်ငံခြားသားဧည့်သည်များ မကြာခဏလာရောက်လေ့လာရင် ကလေးငယ်များအတွက် စာအုပ်၊ခဲတံများ အလှူခံရရှိသော်လည်း လုံလောက်ခြင်းမရှိသည့်အနေအထားဖြစ်သည်။ ဧည့်သည်တစ်ဦးလျှင် စာအုပ်၂ဒါဇင်နှင့် ခဲတံ၁ဒါဇင်လောက်သာလှူဒါန်းနိုင်ခြင်းများလက်ခံရရှိသော်လည်း ထိုဧည့်သည်တို့၏ လှူဒါန်းမှုကို များစွာ အားကိုးနိုင်ခြင်း မရှိပေ။
ဆရာတော်အနေဖြင့် အခြားနယ်ခံ အလှူရှင်များ၊ ဆရာတော်အား လာရောက်လှူဒါန်းမှုများနှင့် ရပ်တည်နေခြင်းဖြစ်သည်။
ကျောင်း၏အဓိကလိုအပ်ချက်မှာ ဗလာစာအုပ်၊ပုံနှိပ်စာအုပ်နှင့် ခဲတံဖြစ်သည်။ လမ်းပန်းဆက်သွယ်ရေး ဝေးလံလှသဖြင့် အလှူရှင်အရောက်နည်းသည့်ဒေသတစ်ခုလည်းဖြစ်သည်။
ကလေးများသည် မိဘနှင့်နေထိုင်ကြီးပြင်ရမှု၊ မေတ္တာအပြည့်ရရှိမှုတို့ကြောင့်လားမသိ... ရန်ကုန်ရှိ ပရဟိတဂေဟာရှိ ကလေးငယ်များနှင့်မတူ လူမှုဆက်ဆံရေးတွင် ရဲရင့်မှုအပြည့်ရှိခြင်း၊ မိမိတို့၏ အိမ်ထောင်စုအကြောင်းကို ကောင်းမွန်စွာပြောပြနိုင်ခြင်းများကိုတွေ့ရသည်။
ဖေါ်ပြပါပုံမှာ သူငယ်တန်းတွင်ပညာသင်ကြားနေသော မအင်ကြင်းမေ၏ပုံဖြစ်သည်။
မေး။ ။သမီးနာမည်ဘယ်လိုခေါ်လဲ
ဖြေ။ ။သမီးနာမည် အင်ကြင်းမေလို့ခေါ်ပါတယ်။
မေး။ ။ သမီးအဖေနဲ့အမေနာမည်ပြောပြပါအုံး။
ဖြေ။ ။ သမီးအဖေက ဦး.......နဲ့ အမေ့နာမည်ကဒေါ်.........ဖြစ်ပါတယ်။
မေး။ ။ သမီးအဖေနဲ့အမေက ဘာအလုပ်လုပ်ကြလဲသမီး။
ဖြေ။ ။ သမီးအဖေက ခြေထောက်မကောင်းလို့အလုပ်မလုပ်နိုင်ပါဘူးရှင့်။ အမေက ဟင်းရွက်ရောင်းပါတယ်။ အမေ၀ယ်ပေးတဲ့ ဈေးဝယ်ထားတဲ့ဟာကို အဖေက အိမ်မှာချက်ပေးပါတယ်....။
ကျွန်မ အတော်အံ့သြသွားပါတယ်။ ကျွန်မလာမယ် ကျွန်မမေးမယ်ဒါကြောင့်ဒီလိုဖြေရမယ်လို့ ဘယ်သူကမှ ပြောထားပုံမရပါဘူး။ ကျွန်မမေးတာကို ပြုံးပြီးဖြေနေတာလေးက အတော်လေးကို သွက်သွက်လက်လက်ကလေးဖြစ်ပါတယ်။
အင်ကြင်းမေတို့လို သွက်လက်ချက်ချာတဲ့ ကလေးများရဲ့စာသင်ကျောင်းလေးကို ကိုယ်တိုင်သွားရောက်လှူဒါန်းနိုင်ခြင်းမရှိတောင် ဆက်သွယ်လှူဒါန်းချင်တဲ့ စိတ်များရှိရင်လဲ ဆက်သွယ်လှူဒါန်းလို့ ရပါကြောင်း ကလေးများအကျိုးမျှော်လို့ နှိုးဆော်တင်ပြလိုက်ရပါတယ်ရှင့်။
(ယဉ်ယဉ်ငြိမ်း)
yin2nyein@gmail.com
--------------------------------------------------------------------------
မြန်မာပြည်မှာ ရှိတဲ့ ကလေးငယ်များ ပညာသင်ကြားရေးအတွက် အလှူဒါနပြုလုပ်လိုသူများ မယဉ်ယဉ်ငြိမ်း (yin2nyein@gmail.com) (Helping Hands for New Generation HH4NG) ကို ဆက်သွယ်ပြီး မေးမြန်းလှူဒါန်းနိုင်ပါတယ်နော်။
Helping Hands for New Generation (မယဉ်ယဉ်ငြိမ်းနဲ့ အဖွဲ့) ရဲ့ ပရဟိတလူငယ်ဂေဟာ၊ မိဘမဲ့ကျောင်း စတာတွေမှာ အလှူအတန်းပြုကြတာတွေရယ်၊ ပညာလိုလာပြီး ပညာသင်စရိတ်မတတ်နိုင်တဲ့ကလေးငယ်တွေကို ပညာသင်စရိတ် ကူညီဆောင်မပေးတာတွေရယ်၊ အစရှိတာတွေကို Helping Hands for New Generation Blog မှာလည်း ဖတ်ကြည့်နိုင်ပါတယ်။
Blog မှာ update မလုပ်ဖြစ်ကြပေမယ့်၊ HH4NG ဟာ အမြဲတက်ကြွနေကြပါတယ်။
ကိုယ့်အတွက် ဘာရယ်မဟုတ် တစ်ပတ်လောက်နဲ့ သုံးဖြုန်းပစ်လိုက်မယ့်၊ မလိုအပ်ဘဲနဲ့ အကျီ င်္တစ်ထည်ဝတ်လိုက်မိမယ့် ငွေကြေးပမာဏဟာ ကလေးငယ်တစ်ယောက်ရဲ့ အနာဂတ်အတွက် တစ်နှစ်စာ ပညာသင်ကျောင်းစရိတ် ဖြစ်ပါတယ် လို့ သိလိုက်ရတဲ့အခါ၊ တကယ်လိုအပ်တဲ့နေရာမှာ လှူလိုက်ရတာပါလားလို့ တွေးမိပြီး ကြည်နူးစရာကောင်းတဲ့ ခံစားမှုမျိုး ခံစားခဲ့ဖူးပါတယ်။
နည်းသည်များသည်မဟုတ်၊ ဘယ်လိုနည်းနဲ့ ဘယ်မှာ လှူဒါန်းနိုင်တယ်ဆိုတဲ့ အချက်အလက်တွေကို မယဉ်ယဉ်ငြိမ်း (yin2nyein@gmail.com) ထံ ဆက်သွယ်ပြီး မေးမြန်းလို့ ရပါတယ်။
ကျေးဇူးတင်ပါတယ်။ ။
edit: ဓာတ်ပုံများ
Oct 21, 2009
မပြောဖြစ်ခဲ့သော စကားများ နောက်ကွယ်ရှိ လျှို့ဝှက်စာလုံးများ (သို့မဟုတ်) သိဂီ င်္
(၂၀၀၀ပြည့်နှစ်)
“ပြော... ”
“အံမယ်..လေသံကလဲ မာလိုက်တာ။”
သူမ၏ အသံတိုးတိုးမျှင်မျှင်လေးကို ကြားလိုက်ရသည့်ခဏ၊ သူ့တစ်ကိုယ်လုံး မိုးစိုပြီး ချမ်းစိမ့်စိမ့်ဖြစ်ချင်နေသည်များ ပျောက်သွားသလို ခံစားလိုက်ရသည်။
“ငါ.. လှည်းတန်းမီးပွိုင့်နားက ဆက်သွယ်ရေးဖုန်းကနေ ဆက်တာ။ နင့်လို အိမ်မှာထိုင်ပြီး အလကားပြောနေတာ မဟုတ်ဘူး။ ဖုန်းပြန်ခေါ်ပါအုံး ဆိုလို့ ငါ အခုပြန်ခေါ်တာ..၊ ဘာလဲ..မြန်မြန်ပြော။”
“password ပေးမလို့လေ။ နင်ပဲ ငါ့ Template ပြင်ပေးမယ်ဆို။”
“password မလိုပါဘူး။ နင် သင်တန်းကို လာမှ အတူတူပြင်ကြမယ်။”
“ပြောချင်လို့ပါဟယ်..ဟိဟိ”
“ဒါဆိုလည်း ပြီးရော၊ ခဏလေး။ ငါ ရေးမှတ်ထားမယ်။”
“စီ၊ အိတ်ခ်ျ၊ အိုင်၊ တီ၊ ပီ”
“အင်း.. c h i t p..”
“အေ၊ အာ၊ တီ ၊ အီး၊ အယ်လ်.. ဒါပဲ။”
“a r t el.....။
c h i t p a r t e l ဟုတ်လား။ နင့်ဟာကြီးကလဲ ဘာကြီးတုန်း... ချာပါတီလား။”
“ကောင်စုတ်၊ ချာပါတီ.. နင်ပဲစား။ သေချာ ဖတ်ကြည့်အုံး။”
“ဟင်.. ချစ်..ပါ..တယ်..၊ ဟုတ်လား။”
“အေးလေ..နင့်ကို အဖြေပေးတာလေ။ ဘာအခုမှ ရူးကြောင်ကြောင်လုပ်နေတာလဲ။”
“သိဂီ င်္.. နင် အတည်ပြောတာလား။ ငါ နင့်ကို အဖြေတောင်းတုန်းက အောင်သီဟခိုင် မိန်းမ ဗိုက်ကြီးတုန်းက။ ခု သူတို့ကလေးတောင် လမ်း စ လျှောက်နေပြီ။ နင်ပဲ.. အဲဒီ့အကြောင်း မပြောရဘူး၊ ပြောရင် မခေါ်တော့ဘူးဆိုလို့ .. ငါ့မှာ ယောင်ပြီးတော့တောင် မဟရဲဘူး။ ခုကျမှ ဗြုန်းစားကြီး။”
“အံမယ်..။ အဖြေ.. မလိုချင်လဲ နေပေါ့။ ငါ password ပြန်ပြောင်းလိုက်မယ်။ ဒါပဲ။ နောက် တွေ့မှ ဆက်ပြောမယ်။”
“လိုချင်တာပေ့ါဟာ..။ ဟဲ့..နေအုံး။”
သူမ ဖုန်းချသွားသည်။ သူမသည် ယခုကဲ့သို့ပင် မမျှော်လင့်သော အချိန်များတွင်၊ မျှော်လင့်မထားသော အကြောင်းအရာများကို လုပ်ဆောင်လေ့ရှိသည်။
ယခင်က သူနှင့် သူမသည် သူငယ်ချင်းအရင်းခေါက်ခေါက်များ ဖြစ်ကြ၏။
ထိုနေ့မှ စ၍ ချစ်သူများ ဖြစ်ကြလေသည်။
(၂၀၀၁ ခုနှစ်)
သူမသည် သူ၏ အချစ်ဦး မဟုတ်ပါ။ သို့သော် အချစ်ဆုံးဖြစ်သည်။
သူမ ပြုံးလိုက်သောအခါ လင်းလက်သွားသော မျက်ဝန်းလေးများကို သူ ချစ်သည်။
သူမ စိတ်ညစ်သောအခါ မျက်မှောင်ကျုံ့ထားသော မျက်ခုံးနှစ်ခုကြားရှိ တွန့်နေသော နှဖူးပြင် အစိတ်အပိုင်းလေးတစ်ခုကို သူ ချစ်သည်။
စာသင်ချိန် အတန်းထဲတွင် လွယ်အိပ်ပေါ် မှောက်အိပ်နေရမှ အတန်းချိန်ပြီးဆုံးသွား၍ အိပ်မှုန်စုံဖွား ထ လာ သောအခါ ပါးပြင်ပေါ်တွင် ထင်နေလေ့ရှိသည့် လွယ်အိပ်ရာလေးများကို သူ ချစ်သည်။
လက်သည်းအရှည် မထားတတ်သော၊ လက်သည်းနီ မဆိုးတတ်သော သူမ၏ တုံးတိတိ လက်သည်းလေးများကို သူ ချစ်သည်။
သူမကို ချစ်ရသည်မှာ အကြောင်းအရာတစ်ခုခုကြောင့် မဟုတ်ဘဲ၊ သူမသည် သူမဖြစ်နေသောကြောင့်သာ သူ ချစ်ခြင်း ဖြစ်သည်။
ချစ်စရာကောင်းသောကြောင့် ချစ်လျှင်၊ ချစ်စရာမကောင်းတော့သော တစ်နေ့ အချစ် ပျောက်ပျက်သွားနိုင်သည်။
လှသောကြောင့် ချစ်လျှင်၊ အလှပျက်သွားသော တစ်နေ့ အချစ် ပျက်သွားနိုင်သည်။
သူ့တွင် ထိုသို့သော အကြောင်းအရာများ မရှိပါ။
ရိုးရှင်းစွာ ချစ်ခဲ့ရပါသည်။
(၂၀၀၂ ခုနှစ်)
“ငါ.. password ပြောင်းလိုက်ပြီ။”
“ဘယ် အီးမေးကို ပြောတာလဲ။ ငါတို့နှစ်ယောက် အတူတူသုံးနေကြဟာကို ပြောတာလား။ ဘာဖြစ်လို့လဲ..သိင်..”
သူ့ ပခုံးစွန်းကို သူမ နမ်းနေကြအတိုင်း တစ်ရှိုက်မက်မက် နမ်းပါသည်။
“ငါ နင့်ကို မချစ်တော့ဘူး။ ပျော့ညံ့လွန်းတဲ့ နင့်ကို.. မချစ်တော့ဘူး။ နင့် အလုပ်၊ နင့် သူငယ်ချင်းတွေ၊ နင့်ဆွေမျိုးတွေနဲ့ ယှဉ်ရင် အမြဲပဲ ငါက နောက်ဆုံးမှ ဖြစ်ဖြစ်နေတတ် အဖြစ်မျိုးကိုလဲ မလိုချင်တော့ဘူး။ အများအမြင်မှာ..ငါကသာ ချစ်နေ၊ ဂရုစိုက်နေရပြီး၊ နင့်ဘက်က နည်းနည်းလေးမှ ယုယမှုမရှိတဲ့ အဖြစ်မျိုးကိုလည်း ငါ.. မုန်းတယ်။ နင့်ကို ချစ်ရလွန်းတဲ့ အဖြစ်ကို ငါ...
ငါ.. မလိုချင်တော့ဘူး။”
နမ်းသည်။ မချစ်တော့ဘူး - ဟု ပြောသည်။ ထို့နောက် သူမ ငိုပါသည်။
သူ သူမကို ချစ်ခဲ့ရသည့် အချစ်များတွင် အကြောင်းအရာများ မရှိသော်လည်း
သူမ၏ အချစ်တွင် အကြောင်းအရင်းများစွာရှိခဲ့သည် ဆိုသောအချက်ကို သူ နားမလည်ခဲ့မိပါ။
(၂၀၀၃ ခုနှစ်)
တစ်ရက်တွင် သူမသည် ဒဏ္ဍာရီ ဇာတ်ကားတွင်းမှ မေသန်းနု ကဲ့သို့ မှန်တင်ခုံရှေ့တွင် ပြုံးပြုံးလေးထိုင်နေသည်ကို သူ တွေ့ခဲ့ရသည်။ ထိုဇာတ်ကားသည် သူ၏ အကြိုက်ဆုံးကားများတွင် တစ်ကားအပါအ၀င်ဖြစ်ခဲ့သည်။ 
ဘာကြောင့်များ ထိုဇာတ်ကားကို သူနှစ်သက်ခဲ့မိပါလိမ့်...။
သူနှင့် သူမ နောက်ဆုံးတွေ့သော အချိန်တွင် သူမ၏ အသက် ၂၃နှစ်ဖြစ်သည်။ ထို့နောက်ပိုင်းတွင် သူတို့နှစ်ယောက် ဆက်မတွေ့တော့ပါ။
သူသည် သူမအကြောင်း တွေးမိသော အခါတိုင်း သူနှင့် မဆိုင်တော့သည့် သူတစ်ယောက်၏ အကြောင်းကို တွေးတောသည်ဟု စိတ်ထဲတွင် အမှတ်မထားမိပါ။
သူ၏ ချစ်သူအကြောင်း၊ ချစ်သူနှင့် သူ၏ ချစ်ခဲ့ရသော နေ့စွဲများအကြောင်းကို စိတ်ရှင်းစွာနှင့် တွေးမိခြင်းသာ ဖြစ်၏။
ထို့အတွက် သူ့တွင် အပြစ်ရှိပါသလား။ ထိုသို့ မထင်မိခဲ့ချေ။
သူမနှင့် အဆက်အသွယ်များ ပြတ်သွားခဲ့သည်။ တစ်ဆင့်စကား၊ သတင်းစကားများလည်း မကြားရတော့ပေ။
သူ၏ အတွေးထဲတွင် သူမသည် အသက် ၂၃နှစ်ထက် မည်သည့်အခါမျှ မကြီးပါ။
သူမ အဖွားကြီးအရွယ်သို့ ရောက်ရှိစေကာမူ၊ သူမအကြောင်း သူ စဉ်းစားမိသောအခါတိုင်း သူမသည် သူနှင့် ချစ်ခဲ့သည့် အသက်အရွယ်မှာပင်၊ ချစ်စဖွယ် အမူအရာများဖြင့်၊ တီတီတာတာ စကားဆိုနေဆဲပင် ဖြစ်ပါမည်။
(၂၀၀၅ ခုနှစ်)
တစ်ညတွင် အိပ်မက်တစ်ခု၏ အလယ်၌ သူ လန့်နိုးလာပြီး၊ သူတို့နှစ်ယောက် အတူတူ အသုံးပြုခဲ့ဖူးသော အီးမေးလိပ်စာအား စိတ်ထဲတွင် ရှိနေသည့် password တစ်ခုဖြင့် သူ ဖွင့်ကြည့်လိုက်မိသည်။
ထိုအခါ..။ ။
Oct 12, 2009
ဓာတ်ပုံရိုက် ၀ါသနာပါသူတစ်ဦး၏ မှောင်မိုက်သော နေ့လယ်ခင်း
သူ ဓာတ်ပုံဆရာ မဟုတ်ပါ။ ဓာတ်ပုံရိုက်ရသည်ကို ၀ါသနာပါသောကြောင့်သာ ရိုက်နေခြင်း ဖြစ်၏။
ဓာတ်ပုံပညာဖြင့်အသက်မွေးဝမ်းကျောင်းရန်လည်း ရည်ရွယ်မထားသောကြောင့် ထိုပညာရပ်အား သေသေချာချာ ဂဃနဏလည်း မသင်ဖြစ်ခဲ့။ ရိုက်တတ်ရုံ - ဟူသော စကားလုံးသည် သူနှင့် သင့်တော်လှသည်။ ဒစ်ဂျစ်တယ် ကင်မရာများ ပေါ်လာသောကြောင့်လည်း သူ ရိုက်ဖြစ်နေခြင်း ဖြစ်လိမ့်မည်။ ဖလင်သုံး၍ရိုက်ရသော ကင်မရာများဖြင့်သာဆိုလျှင် သူ ယခုကဲ့သို့ ဓာတ်ပုံများများစားစား ရိုက်ဖြစ်မည် မဟုတ်ပေ။
ထိုအရာအား ၀ါသနာပါသောအခါ ငွေကုန်ပါသည်။
ကင်မရာဝယ်ရုံဖြင့် မပြီးသေး၊ မှန်ဘီလူးများ၊ သုံးချောင်းထောက်နှင့်အတူ တစ်ခြား လိုအပ်သော တိုလီမိုလီများကိုလည်း ၀ယ်ရသေးသည်။ တစ်ခြားနေရာများတွင် ဖြုန်းတီရန်အတွက် အသုံးစရိတ် အပိုမရှိသော်လည်း၊ ၀ါသနာအတွက် လိုအပ်သော ပစ္စည်းများကိုမူ သူ စုဆောင်း၍ ၀ယ်ဖြစ်ပါသည်။ 
တစ်နေ့တွင် ၀ါသနာတူရာဓာတ်ပုံရိုက်သူများ စုပေါင်း၍ ကျေးလက်ဒေသဘက်သို့ ဓာတ်ပုံရိုက်ထွက်ရန် ချိန်းဆိုဖြစ်ကြသည်။ သူသွားရာသို့၊ ဓာတ်ပုံမရိုက်သော်လည်း အဖော်အဖြစ် ပြောမနာဆိုမနာ သူငယ်ချင်းတစ်ယောက်လည်း အတူတူပါလာ၏။
တောဘက်တွင် ဓာတ်ပုံရိုက်ရန်အတွက် လှပသော ရှူခင်းများသာမက ကလေးငယ်များ၏ အပြစ်ကင်းစင်သော မျက်နှာလေးများလည်း ရှိ၏။ ကျောင်းဖွင့်ရက်ဖြစ်သော်လည်း ကလေးအများစုကို ရွာထဲနှင့် လယ်ထဲတွင် တွေ့ရသည်။
သို့နှင့် ပါးကွက်ကြားဖြင့် ကလေးငယ်၊ ကျောင်းစိမ်းအကျီ င်္နွမ်းလျလျဖြင့် ကလေးငယ်၊ ပေရေသော အကျီ င်္ဝတ်ထားသောလည်း ပြုံးချိုရွှင်လန်းနေသော ကလေးငယ် စသည်ဖြင့် ကလေးပေါင်းစုံအောင် သူတို့ ရိုက်ကြသည်။ ကလေးများကလည်း မငြီးမငြူ ပြုံးပြုံးရွှင်ရွှင်ဖြင့်ပင် သူတို့အား ကူညီကြပါသည်။
နေ့လယ်ချိန်ရောက်၍ ခဏနားကြသော အချိန်တွင် သူ့နှင့် သူ့သူငယ်ချင်း၏ အနားသို့ ကလေးငယ်နှစ်ဦး ရောက်လာသည်။
“ဦးတို့ ကင်မယာကြီးတွေက အကြီးကြီးတွေပဲနော်။”
“အေးကွ၊ ခုနက မင်းတို့ကို ရိုက်ထားတဲ့ပုံတွေ ပြန်ကြည့်ချင်ရင် ဒီမှာ လာကြည့်လှည့်။ ဒီမှာ မင်း ပုံ။”
“ဟာ.. မိုက်တယ်ဗျာ။”
ကလေးငယ်က သူ့ ကင်မရာအား လက်ဖြင့်ထိကြည့်မည့်ပုံပေါ်သဖြင့် သူ အထိမခံဘဲ အနည်းငယ် ခွာလိုက်သည်။
“ဦးတို့ ကင်မယာကြီးတွေက ဘယ်လောက်လောက်ပေးရလဲ။”
“ကင်မရာ ကို ထားလိုက်တော့ကွာ။ ဒီ မှန်ဘီလူးတွေတင်ကို ငါ သိသလောက် ၂သိန်း၊ ၃သိန်း ပဲကွ။”
သူ့ သူငယ်ချင်းက ကလေးငယ်၏ မေးခွန်းကို တက်တက်ကြွကြွဖြင့် ၀င်ဖြေသည်။
“ဗျာ ၂သိန်း။ ၂ သိန်းဆိုတာ ဘယ်လောက်မှန်း ကျနော် သေချာ မသိပါဘူးဗျာ။ ဒါပေမယ့်.. အဖေ့နွားကြီးရောင်းတုန်းကလည်း ၂သိန်းတဲ့။ အမေကြီးနေမကောင်းလို့ ငွေလိုတာနဲ့ နွားရောင်းပြီး ဆေးကုလိုက်ရတာ..။ နွားရောင်းပြီး.. သုံးရက်လောက်ပဲ ကြာတယ်.. အမေကြီးလည်း သေတာပါပဲ။”
သူ့ နားထဲတွင် အဖေ့နွားကြီး ဆိုသည့် အကောင်ကို မျက်စိထဲတွင် မြင်ယောင်လာမိ၏။
ထို့နောက် သူ့မှန်ဘီလူးကို တယုတယ ပြန်ကြည့်မိသည်။
“အမေကြီးဆိုတာ မင်း အမေလား။”
သူ့သူငယ်ချင်းကမူ မည်သည့်အရာကိုမျှ ဂရုမစိုက်ဟန်ဖြင့် ခံစားမှုကင်းမဲ့စွာ စကားဆက်လက်ဆိုနိုင်နေသေးသည်။
“မဟုတ်ပါဘူး။ အဖေ့အမေ။ ကျနော့် အမေလည်း ခု ပန်းနာ ထ နေတယ်။ နောက်ဆုံး နွားတစ်ကောင် သွားတော့မယ် ထင်တယ်..လို့ အဖေ ပြောနေတာပဲ။ ”
ကလေးငယ်က ဦးတည်ရာမဲ့ စိတ်လွတ်ကိုယ်လွတ် ပြောဆိုနေခြင်း ဖြစ်သည်။
သူ့အတွက်မူ နောက်ဆုံး နွားတစ်ကောင်ဟု အသံကြားလိုက်ပြီးနောက် သူ ကင်မရာနှင့် မှန်ဘီလူးများကို အိတ်ထဲသို့ သေချာထည့်သိမ်းလိုက်လေတော့သည်။ ။
pics from: digital-photography101.com, www.psi.org
Oct 8, 2009
အမျိုးသမီးများအတွက် အိမ်တွင် ပြုလုပ်နိုင်သော လေ့ကျင့်ခန်းများ
ကလေးအမေများအတွက် လေ့ကျင့်ခန်းများ - လို့ ပြောထားပေမယ့် ဒီအခြေခံလေ့ကျင့်ခန်းတွေက ဂျင်မ်မသွားချင်ဘဲ အိမ်မှာပဲ လေ့ကျင့်ခန်းလုပ်ချင်တဲ့သူ အားလုံးအတွက် သင့်တော်တယ် ထင်မိပါတယ်။
(လေ့ကျင့်ခန်း လုပ်စ မရှိဘဲ အခုမှ စ လုပ်မယ် ဆိုရင်တော့ ဆရာဝန်နဲ့ အရင်တိုင်ပင်သင့်ပါတယ်။)
မိခင်များအတွက် ကိုယ်လက်လေ့ကျင့်ခန်း
Special Thanks to original uploader(s).
Oct 7, 2009
ရယ်သံ သက်သက်များ
ဆယ်ကျော်သက်
"ခစ်..ခစ်..ခစ်..သွား... အဲဒီလူကြီးလေ.. သူများကို ဘာတွေ လာပြောနေမှန်း မသိဘူး...။ ခစ်ခစ်..။"
အပျိုဖော်ဝင်စ
"အဟက်..ဟက်.. သိသားပဲ..၊ သူ ဒို့ကို ဒါပဲ ပြောတော့မယ် ဆိုတာကို။ ဟက်..."
အပျိုနည်းနည်းဟိုင်းစ
"ဟိဟိ.. ဒါလေးပြောဖို့များ ဖုန်းထဲကပြောလဲ ရနေတဲ့ဟာကိုနော်..။ ဒီလို.. တစ်ခါပြောရုံနဲ့ မရဘူး။ တစ်သက်လုံး... ထပ်ကာထပ်ကာ ပြောရမယ်နော်.. နော်..။ ဟိ..။"
အိမ်ထောင်ကျစ
"ဟီးဟီး.. ဟီးဟီး..။"
သားသမီးများ ရပြီးကာစ
"ဟာဟ.. အဲဒီလိုပဲ ရီလိုက်တော့မယ်။ အရင်ကလို လုံးဝ လုံးဝ မဟုတ်တော့ဘူးနော်။ ကျမ မသိဘူးများ မှတ်နေလား။"
သားသမီးများ အရွယ်ရောက်ပြီးနောက်
"ဟားဟား..ဟားဟား။ ကျုပ်ကို ဒီလို လှည့်လို့ ရမယ် ထင်နေလား။"
ဆုံးပါးခါနီး
".................."
Sep 30, 2009
မြေခ ချိန်
အရွက်တွေက ကြေကွဲစွာ ကြွေပြပြီး၊ ရင်နဲ့မဆန့်တဲ့ ငိုသံကြီးနဲ့ .. ဆောင်းလာတော့မယ့်အကြောင်း.. ပြောကြတယ်။
မိုးဖွဲဖွဲလေးတွေကပါ အရွက်လေးတွေရဲ့ ရင်ကွဲဇာတ်လမ်းကို မျက်ရည်စမ်းပေးလေရဲ့။
ချစ်သူရေ... ဘ၀တွေ.. ဘ၀တွေလေ..။
(မနှစ်က Fall မှာ ရိုက်ဖြစ်ခဲ့တဲ့ ပုံ။)
ဟိုး တစ်ခါဆီက.. အလွမ်းပင်လယ်ကြီးတစ်ခု ဖြတ်ပြီး ပျံသန်းနေတဲ့ အလွမ်းငှက်လေးတစ်ကောင်ဟာ.. လွမ်းလွန်းလို့ ရင်ကွဲတာတောင်မှ ပင်လယ်ထဲပြုတ်ကျ မသေရအောင် အားတင်းပြီး မာန်နဲ့ ဖြတ်ပျံသန်းတယ်တဲ့။ ချစ်သူဆီ အရှင်လတ်လတ်မရောက်နိုင်တောင်မှ.. ချစ်သူက သူ့ကို လုံးဝရှာမတွေ့တဲ့ အဖြစ်မျိုး.. မဖြစ်စေလိုဘူး။ ချစ်သူရဲ့ပခုံးပေါ်မှာ အသက်ငွေ့ငွေ့လေးနဲ့ပဲဖြစ်ဖြစ်.. အသက်ငွေ့ငွေ့လေးနဲ့ပဲ ဖြစ်ဖြစ်.. ချစ်ကြင်နာပါရစေတဲ့။
ချစ်သူရေ.. ဘ၀တွေ.. ဘ၀တွေလေ..။
"And in a flash, they are gone." တဲ့၊ The Notebook ရုပ်ရှင်ထဲက ကိုယ် သိပ်နှစ်သက်တဲ့ စာသားလေးပါ ချစ်သူ။
ဟုတ်ပါတယ်လေ..တကယ်ပါပဲ.. "And in a flash, they are gone."
ချစ်သူရေ.. ....... ။
မိုးဖွဲဖွဲလေးတွေက.. ကြွေလွင့်နေတဲ့ အရွက်လေးတွေကို အဖော်ပြုပေးရှာလေရဲ့။
အရွက်တွေက ကြေကွဲစွာ ကြွေပြပြီး၊ ရင်နဲ့မဆန့်တဲ့ ငိုသံကြီးနဲ့ .. ဆောင်းလာတော့မယ့်အကြောင်း.. ပြောကြတယ်။
မကြာခင်.. ကိုယ်တစ်ခါက သိပ်ချစ်ခဲ့ဖူးတဲ့.. မပြောင်းလဲတဲ့..ဆောင်း၊
တစ်ခါက သိပ်ချစ်ခဲ့ဖူးတဲ့.. ပြောင်းလဲသွားတဲ့..ဆောင်း
သူ.. လာတော့မယ်။
ချစ်သူရေ... ဘ၀တွေ.. ဘ၀တွေ...။ ။
Sep 29, 2009
တစ်နှစ် သုံးကြိမ်
မြတ်နိုးဆီမှာ သီတင်းကျွတ်လပြည့်နေ့ ၃ရက်နေ့လို့ ပြောမှ သီတင်းကျွတ်လပြည့်နေ့ကို သတိထားမိတဲ့ အခြေအနေရောက်နေပြီ ဖြစ်တဲ့အတွက် ကိုယ့်ကိုယ်ကို တော်တော်အခြေအနေဆိုးနေပြီထင်မိတယ်။ ဒူဘိုင်းမှာ နေတုန်းကမှ လပြည့်လကွယ်တွေ သတိတရ ရှိမိသေးတယ်။
ဒီလိုနဲ့.. သီတင်းကျွတ်လပြည့်နေ့တွေမှာ မိဘနှစ်ပါးကို ကိုယ်တိုင်ကိုယ်ကျ မကန်တော့နိုင်တာ ၆နှစ်ရှိပြီ။ နောက်နှစ် သီတင်းကျွတ်ရော.. ပြန်နိုင်မှာတဲ့လားလေ။
အဖေဟာ ခုထိ ကိုယ့်ဆီ စာတစ်ခါတစ်ခါရေးရင် ကျန်းမာရေးနဲ့ အစစအရာရာ ဂရုစိုက်ဖို့လက်ရေးနဲ့ နှစ်မျက်နှာ၊ သုံးမျက်နှာရေး၊စကန်ဖတ်ပြီး ကိုယ့်ဆီပို့ပေမယ့် ကိုယ်က ကွန်ပျူတာလေးနဲ့ရိုက်ရတာတောင် ၃ကြောင်း၊ ၄ကြောင်းထက် ပိုမရေးဖြစ်။ အမေကတော့ စာမရေးပေမယ့် အိမ်မှာနေပြီး ကိုယ့်အကြောင်း ထိုင်ပြောနေတတ်တဲ့သူ။
မိဘနှစ်ပါးကို ချစ်တာမှာ ပါးစပ်ကသာ ထိုင်ချစ်နေ၊ သတိရနေဖြစ်ပြီး ဘာမှ တစ်ခုတ်တရ မကန်တော့ဖြစ်တာတောင် ကြာပြီ။
ခု.. ရေးခဲ့ဖူးတဲ့ (တင်ပြီးသား) တစ်နှစ်သုံးကြိမ်နဲ့ပဲ သီတင်းကျွတ်လပြည့်နေ့အတွက် ပြန်တင်ဖြစ်တယ်။ စာထဲက အောင်ခန့်ဟာ မိခင်မရှိတော့တဲ့ အဖေတစ်ခုသားတစ်ခုဖြစ်တဲ့အတွက် ကိုယ့်အကြောင်း မဟုတ်ပေမယ့်၊ အဖေနဲ့ ကိုယ့်အကြောင်းလည်း တစ်စိတ်တစ်ဒေသ ပါခဲ့ဖူးတဲ့ စာပါ။
တစ်နှစ် သုံးကြိမ်
(အခန်း - ၁)
သီတင်းကျွတ်တော့မည်။ သီတင်းကျွတ်ခါနီးပြီဆိုသည်နှင့် ကျွန်တော် ပထမဆုံးလုပ်သည့်အလုပ်သည် ခြံထဲတွင် ကျင်းလေးများ တူးခြင်းဖြစ်သည်။ ကျင်းတူးသည် ဆိုရာတွင် အချင်းနှစ်လက်မ ကျယ်ပြီး နှစ်လက်မခန့်နက်သော ကျင်းငယ်လေးများကို ခြံစည်းရိုးနှင့် ကပ်လျက်ရှိသော မြေကြီးတွင် တူးခြင်းဖြစ်သည်။
ထို့နောက် ခြံထဲရှိ ဗာဒံပင် တွင် ဗာဒံရွက်ကြီး အရွက်ကြီးမည်မျှခန့် ရနိုင်သည်ကို လေ့လာမည်။ သို့နှင့် သီတင်းကျွတ် အဖိတ်နေ့၊ သီတင်းကျွတ်လပြည့်နေ့ နှင့် လပြည့်ကျော်တစ်ရက်နေ့များတွင် အဆိုပါကျင်းများထဲတွင် ဖယောင်းတိုင်များ စိုက်လျက် ဖယောင်းတိုင်တစ်တိုင်ချင်းစီကို ဗာဒံရွက်များဖြင့် ပတ်ပတ်လည်ကာ ကာ မီးထွန်းတော့သည်။ အနီးကပ်ကြည့်လျှင် အဆိုပါကဲ့သို့ မီးထွန်းမှုမှာ ထူးခြားမှု သိပ်မရှိသော်လည်း အဝေးမှ ကြည့်လျှင်၊ အထူးသဖြင့် ခြံပြင်မှ ကြည့်လျှင် အစိမ်းရောင်မီးပုံးများကို မြေကြီးတွင် ချ၍ ထွန်းထားသကဲ့သို့ မီးရောင်တလဲ့လဲ့ဖြင့် လွန်စွာလှပပါသည်။
သို့သော် ထိုသို သူများနှင့်မတူ တမူထူးစွာ မီးပူဇော်ခြင်းကို အဖေက မကြိုက်၊ သီတင်းကျွတ်မီးထွန်းပွဲပြီးသွားလျှင် ခြံထဲတွင် ကျင်းဟောင်းလောင်းများဖြင့် ရုပ်ပျက်သည်။ ခြံထဲရှိ သူ့ပန်းပင်များကို မီးဟပ်မှာစိုးသည် စသည်ဖြင့် ပွစိပွစိပြောလေ့ရှိသည်။
သို့သော် အဖေ မည်မျှပင် ပြောပြော ကျွန်တော်သည် ၉နှစ်သားမှ စ၍ အဆိုပါကျင်း၉ကျင်းတူးပြီး မီးပူဇော်ခဲ့သည်မှာ ယခု ကျွန်တော် နိုင်ငံခြားသို့ အလုပ်ဖြင့် ထွက်မလာခင် သီတင်းကျွတ်အထိ ၂၄ကျင်း တူးခဲ့သည်။
ငယ်စဉ်ခါတွင် ဆော့ကစားချင်စိတ်ဖက်၍ ဤနည်းဖြင့် မီးပူဇော်ခဲ့ခြင်းဖြစ်သော်လည်း အရွယ်ရောက်လာသောအခါ သီတင်းကျွတ်ရောက်လာတိုင်း အဖေ့အား စ နောက် ချင်သော စိတ် စွက်လာသောကြောင့် ယခုကဲ့သို့ မီးပူဇော်မြဲ ပူဇော်နေခြင်း ဖြစ်သည်။ မွေးနေ့သက်စေ့လဲ လှူချင်သေးသည့် ကျွန်တော့်ဆန္ဒအား အဖေသည် လက်မှိုင်ချကာ ကျွန်တော် ထွန်းထားသည့် အစိမ်းရောင်ဖန့်ဖန့် မီးရောင်လေးများကို တငေးတမော ကြည့်နေခဲ့သည်။
(အခန်း - ၂)
ထို့သို့ မီးပူဇော်ပြီးသည်နှင့် စက်ဘီးအား ဆွဲကာ သူငယ်ချင်းများနှင့် လည်ပတ်ရန် ကျွန်တော် ထွက်တော့သည်။ လက်ဘက်ရည်ဆိုင်တွင် ရေနွေးအိုး၅အိုးခန့် ကုန်ပြီးသောအခါမှ အိမ်သို့ ပြန်ရန် သတိရသည်။ ည မိုးစုပ်စုပ်ချုပ်မှ ပြန်လာသော ကျွန်တော့်အား အဖေသည် ခြံစည်းရိုးတံခါးအား မှောင်မှောင်မဲမဲထဲတွင် လာဖွင့်ပေးပြီး ကျွန်တော့် ဗာဒံရွက်မီးအိမ်ရှိ ဖယောင်းတိုင်လေးများအား တစ်တိုင်မီးငြိမ်းသွားတိုင်း နောက်တစ်တိုင်ထပ်စိုက်ပြီး ရတနာသုံးပါးအား ရည်မှန်း၍ သုံးတိုင်မြောက်သည်အထိ ကျင်းပေါက်စေ့အောင် ပူဇော်ထားပေးကြောင်း၊ လေတိုက်ပြီး မီးငြိမ်းမည် ၊၊ မီး စ လွင့်မည် စိုးသောကြောင့် ဂရုတစိုက်ကြည့်နေရကြောင်း၊ ကျွန်တော် စ ခဲ့သည့် အလုပ်တစ်ခုအား သူ့မှာ အမြဲပဲ နောက်က လိုက်ကြည့်နေရကြောင်း တရစပ် ပြောလေ့ရှိလေသည်။
ဤသည်မှာ သီတင်းကျွတ်ရောက်တိုင်း ကျွန်တော်တို့ သားအဖနှစ်ယောက် ကြုံတွေ့နေရသော ပြဿနာဖြစ်၏။ ကျွန်တော်ကလဲ ကျင်းလေးများ တူးမြဲ။ အဖေကလဲ ပွစိပွစိပြောရင်းဖြင့်ပင် ဖယောင်းတိုင်လေးများဖြင့် မီးများ ထွန်းပေးစမြဲပင်။
(အခန်း - ၃)
စာစီစာကုံးရေးရန် ၀ါသနာပါသော ကျွန်တော်သည် သီတင်းကျွတ်ရောက်တိုင်း အလယ်တန်းနှင့် အထက်တန်း ကျောင်း တက်စဉ် သီတင်းကျွတ်လပြည့်နေ့အကြောင်း၊ မယ်တော်မိနတ်သားအား မြတ်စွာဘုရားသခင် ကျေးဇူးဆပ်ရာတွင် နို့တစ်လုံးဖိုးပင် ကျေအောင်မဆပ်နိုင်ကြောင်း၊ သားသမီးများသည် မိဘများအား သီတင်းကျွတ်အခါတွင် ထိကြီးခြင်းငါးပါးဖြင့် ရှိခိုးကန်တော့သင့်ကြောင်း စသည်ဖြင့် စာစီ ကုံးကာ ဖွဲ့နွဲ့ရေးလေ့ရှိသည်။
ကျွန်တော့် သီတင်းကျွတ်စာစီစာကုံးသည် အတန်းထဲတွင် အမှတ်အများဆုံး ရလေ့ရှိလေသည်။
သို့စေကာမူ ကျွန်တော် အဖေ့အား သီတင်းကျွတ်တိုင်း ရှိခိုးဦးချ မကန်တော့ဘူးခဲ့ပါ။ ကိုယ့်အဖေအား ကိုယ်ရှိခိုး ကန်တော့ရမည်ကိုပင် ရှက်သလိုလို ရွံ့သလိုလိုဖြင့် ခံစားရသောကြောင့် ရှောင်ခဲ့သည်။
(အခန်း - ၄)
အခြေခံပညာကျောင်းသားဘ၀တစ်လျှောက်လုံးသာမက တက္ကသိုလ်ကျောင်းသား ဘ၀ရောက်သည်အထိ သီတင်းကျွတ်ချိန်ရောက်တိုင်း ဆရာ၊ဆရာမများအား သူငယ်ချင်းများနှင့် စု၍ ကန်တော့ရန် အဖေ့ဆီမှ လက်ဝါးဖြန့်ကာ မုန့်ဖိုးတောင်းသည်။ ထို့နောက် ဆရာ၊ဆရာမများအား အိမ်ပေါက်စေ့လှည့်လည် ကန်တော့ကာ တစ်ယောက်တစ်လေအား မေ့မကျန်ခဲ့ရန်ပင် ကျွန်တော်မှနေ၍ ဦးဆောင်ပြီး သတိပေးခဲ့သည်။ သီတင်းကျွတ်တိုင်း ကာယကံ၊ ၀စီကံဖြင့် ပစ်မှားခဲ့သည်ရှိသော် အစချီသော ကန်တော့ပန်းဖြင့် ရှိခိုးကန်တော့ကြသည်။
သို့သော် အဖေ့အား ကျွန်တော် ကိုယ်တိုင်ကိုယ်ကျ ရှိခိုးဦးချ မကန်တော့ဘူးခဲ့။
(အခန်း - ၅)
ကျောင်းပြီး၍ အလုပ်ခွင်ဝင်သောအခါ ကိုယ့်လစာ ကိုယ်ဖြင့် မနည်း လောက်အောင် သုံးနေရသော ကျွန်တော်သည် အဖေ့အား သီတင်းကျွတ်ရောက်ရင်တော့ ပစ္စည်းတစ်ခုခု ၀ယ်ပြီး ကန်တော့အုံးမှ ဟူသော စိတ်ကူးရှိလာသဖြင့် (ထိုသို့ စိတ်ကူးပေါ်လာသည်မှာလဲ သီတင်းကျွတ်ရောက်တိုင်း အလုပ်မှ ၀န်ထမ်းများ စုကာ အထက်အရာရှိအား ကိတ်မုန့်စသည်ဖြင့် ကန်တော့သော အလေ့အထကို သတိပြုမိလာသောကြောင့်ပင်။) အဖေ့အတွက် ကိတ်မုန့်တစ်ဗူးဝယ်ပြီး ရေခဲသေတ္တာထဲ ထည့်ထားကာ .. အဖေ .. သား အဖေ့အတွက် ရေခဲသေတ္တာထဲမှာ ကိတ်မုန့်ဝယ်ထားတယ်..နော်..၊ မစားဖြစ်ဘဲ မေ့နေအုံးမယ်.. ဟူလောက်သာ ပြော၍ ကျွန်တော်၏ သီတင်းကျွတ် မိဘအား ကန်တော့သော အစီအစဉ်သည် အောင်မြင်စွာ ပြီးဆုံးခဲ့လေသည်။
အဖေ့အား ကိုယ်တိုင်ကိုယ်ကျ ကန်တော့ပန်းဆင်၍ သေသေချာချာ ရှိခိုးဦးချ မကန်တော့ဘူးခဲ့ပါ။
(အခန်း - ၆)
ကျွန်တော် လက်ရှိအလုပ်လုပ်နေသော နိုင်ငံခြားရှိ ကုမ္ပဏီတွင် မြန်မာများရှိသောကြောင့် ၀ါဝင်ပြီဆိုလျှင်လည်း ၀ါဝင်သည့်အလျောက်၊ သီတင်းကျွတ်လျှင်လည်း သီတင်းကျွတ်သည့်အလျောက် လူပျိုကြီးရေ.. ဒီနှစ်လဲ..မစားရသေးဘူးလား ဟူ၍ အမြဲပင် စ နောက်ခံရလေ့ရှိသည်။ သို့နှင့် သည်နှစ်လဲ သီတင်းကျွတ်တော့မည် ဟူသော အသိသည် ၀င်လာပြန်သည်။ သို့နှင့် တပြိုင်နက် စီမံရေးရာဌာနတွင် တာဝန်ကျသော ဦးတင်မောင်ဝင်းထံ သွား၍ ရန်ကုန်သို့ ခွင့်ပြန်မည့်သူ ရှိမရှိ စုံစမ်းရသည်။
“မင်းက ဘာလုပ်မလို့လဲ.. ဟေ့ကောင်။ ခွင့်ချင်း ချိန်းပြီး မိန်းမယူဖို့ ရန်ကုန် ပြန်မလို့လား..”
ဦးတင်မောင်ဝင်းသည် ကုမ္ပဏီတွင် အလုပ်လုပ်နေသည်မှာ ကြာပြီဖြစ်ပြီး ကျွန်တော်တို့ကုမ္ပဏီရှိ အလုပ်လုပ်နေသော မြန်မာများထဲတွင် အသက်အကြီးဆုံးဖြစ်ကာ သူ၏ သားသမီးများသည်ပင် ဘွဲ့ရကုန်ကြပြီ ဖြစ်ကြောင်း သူ ပြောဖူးလေသည်။
“အန်ကယ်ကလဲ..။ ကျွန်တော့် မှာ ယူရမယ့်သူတောင် မရှိသေးဘူး။ ရန်ကုန် လူကြုံရှိရင် အဖေ့ကို ကျွန်တော့် လခ ထည့်ပေးလိုက်ချင်လို့ပါ။ လခပါပဲ။ သိပ်မများပါဘူး။ စာတောင် မအားတာနဲ့ မရေးဖြစ်ဘူး။”
“ဘာဖြစ်လို့လဲ။ ဟိုမှာ အရေးတကြီး အသုံးလိုလို့လား။ မင်း .. မင်းအိမ်ကို လူကြုံထည့်ပေးလေ့မရှိပါဘူး။”
“မဟုတ်ဘူး.. အန်ကယ် ရ။ ကျွန်တော် သီတင်းကျွတ်အမှီ အဖေ့ကို ကန်တော့ချင်လို့ပါ..။”
“အော်..အေးအေး..ဟုတ်ပြီ။ ငါ leave list ကြည့်ပေးမယ်။.. မင်းက တော်တော် သိတတ်တာပဲ။ သီတင်းကျွတ်ရောက်ရင် .. ကန်တော့ရမယ် ဆိုတာတွေ ဘာတွေ သိတယ်။ နှစ်တိုင်း ကန်တော့နေကြလား။”
ရုံးဆင်းကာနီးပြီ ဖြစ်သောကြောင့် ကျွန်တော်တို့နှစ်ယောက် အေးအေးလူလူ စကားပြောခွင့်ရလေသည်။
“မဟုတ်ပါဘူး။ ကျွန်တော့် အဖေကို ခုချိန်ထိ ထိုင်ပြီး မကန်တော့ ဖူးဘူး.. အန်ကယ်..။ သီတင်းကျွတ်ရောက်ရင်တော့ ကန်တော့ပစ္စည်းလေးတွေ ၀ယ်ပေးဖူးတယ်..”
“ဘာဖြစ်တယ်.. ။ အေး..မင်းတို့ လူငယ်တွေ အဲဒါ ခက်တာပေါ့..။ အိမ်က ကလေးတွေလဲ အဲလိုပဲ။”
“ကျွန်တော်က.. ဟို..ဟို..ကျွန်တော် အဖေ့ကို ထိုင်ကန်တော့ရင် အဖေ .. အမေ့ကိုများ သတိရသွားမလားဆိုပြီး မကန်တော့ဖြစ်တာပါ။”
ကျွန်တော် ဆင်ခြေပေးခြင်းဖြစ်ကြောင်းသာ ကျွန်တော်ဘာသာ ကျွန်တော်သိပါသည်။
“အောင်ခန့် .. ငါပြောမယ်.. ၊ မင်းဟာက မိဘနဲ့ အတူနေပြီး ကိုယ်တိုင်ကိုယ်ကျ ကန်တော့ခွင့်ကြုံတုန်းကလဲ မကန်တော့ဘူး။ အခုလဲ ကန်တော့တယ်ဆိုပြီး စာလေးတစ်စောင်တောင် မရေးဘဲ ပိုက်ဆံပဲ ပို့ပေးမယ် ..ဆိုတော့.. .........
အောင်ခန့်....... သီတင်းကျွတ်ချိန်မှာ မိဘတွေက သားသမီးတွေဆီက မျှော်လင့်တာ ကိတ်မုန့်တွေ၊ လုံချည်ပုဆိုးတွေ၊ ပိုက်ဆံတွေ မဟုတ်ဘူးကွ.. သိရဲ့လား။ ဒါပေမယ့် သူတို့ ဘာမျှော်လင့်လဲ ဆိုတာကို တော်ရုံမိဘကတော့ ဖွင့်ပြောမှာ မဟုတ်ဘူး။ သိတတ်တဲ့ သားသမီးနဲ့ တာဝန်ကျေတဲ့သားသမီး မတူဘူးနော်..။ မင်း အခုလုပ်ပုံက ၀တ်ကျေတန်းကျေ သဘောလိုမျိုးဖြစ်မနေဘူးလား..အောင်ခန့်။ .. အန်ကယ်ပြောပြမယ်..။”
မတော်မသင့်သည်များတွေ့လျှင် ဆုံးမနေကြဖြစ်သော အန်ကယ်သည် ယခု ကျွန်တော့်အား ကိုမြင့်သိန်းတို့ လစာအပျောက် အရက်သောက်စဉ်က ဆုံးမသည့်အတိုင်း ဆုံးမ ပေတော့မည်ဟု တွေးကာ သူ့စကားနောက်တွင် ဟုတ်ကဲ့.. အန်ကယ်.. ဟု သက်ပြင်းချကာ သံယောင်လိုက်လိုက်ရသည်။
“အန်ကယ်တို့ ကျောင်းတက်တုန်းက အန်ကယ့်မှာ အရမ်းခင်တဲ့ သူငယ်ချင်း တစ်ယောက်ရှိတယ်။ ကျောင်းတုန်းကလဲ ဒူးယားမှာ တစ်ဆောင်ထဲပဲ။ ကျောင်းပြီးလို့ အလုပ်ဝင် တော့လဲ နှစ်ယောက်စလုံး နယ်က လာတာဆိုတော့ ရန်ကုန်မှာ တစ်ခန်းထဲ အတူတူ ငှားနေ ဖြစ်တယ်။ ပြောရရင်တော့.. သူလဲ မင်းလိုပဲပေါ့ကွာ..။ သီတင်းကျွတ်ချိန်ရောက်ရင် သူက နယ်က သူ့အမေနဲ့ အဖေဆီကို ဖုန်းဆက်တယ်။ အန်ကယ်ကတော့ သူ့အိမ်နဲ့ ဖုန်းပြောတာ အဲဒီ သီတင်းကျွတ် တစ်ချိန်ပဲ ကြားရတယ်။ သူကတော့ သူ့အိမ်မှာ ဖုန်းမရှိလို့၊ သူများ အိမ်လာပြောခိုင်းရတာ အားနာလို့..လို့ ပြောတာပဲ။ ..
.. သီတင်းကျွတ်လို့ သူ ဖုန်းဆက်ပြီ ဆိုရင် .. အဖေနဲ့အမေ..သား မန်နီအော်ဒါနဲ့ ငွေလွှဲ ထားတယ်။ အဲဒါ လိုတဲ့ဆေးတွေ ၀ယ်သောက်နော်။ စားချင်တာတွေလဲစား။ ကိုယ့်ကိုယ်ကို ဂရုစိုက် .. ၊ သား.. အလုပ်လုပ်နေတာ အမေနဲ့ အဖေအတွက်ပဲ..။.. လို့ အမြဲပဲပြောတတ်တယ်။ .. .. နွေရောက်လို့ အရောင်းကျချိန်ရောက်ရင်တော့ သူ နှစ်ပတ်၊ သုံးပတ်လောက် သူ့နယ်ကို ပြန်လေ့ရှိတယ်။ ..
တစ်နှစ်တော့ မိုးတွင်းကြီးမှာ သံကြိုးလာတယ်။ သူ့အဖေ ရုတ်တရတ် ဆုံးကြောင်း ၊ အမြန်လိုက်လာဖို့လိုကြောင်းပေါ့။ ဒါနဲ့ အန်ကယ်လဲ ခွင့်တင်ပြီး သူနဲ့အတူတူ နာရေးကို လိုက်သွားတယ်။ ဟိုရောက်တော့ သူ့အဖေ အလောင်းကို ကြည့်ပြီး သူငိုတယ်။ နောက်ဆုံးမှာ အလောင်းကို ခေါင်းသွင်းရတော့မှာမို့ အားလုံးကို ကန်တော့ကြ၊ ကန်တော့ကြလို့ တစ်ယောက်ယောက်က အော်လိုက်တော့ .. သူ ကန်တော့တယ်။ ဦးသုံးကြိမ်ချပြီး ကန်တော့တာ အန်ကယ် သတိထားမိတယ်။ အန်ကယ်တို့လဲ ၀ိုင်းကန်တော့ကြတယ်။ ..
.. အောင်ခန့်.. ညကျတေ့ာ နာရေးဆိုတဲ့ အတိုင်း အန်ကယ်တို့ ညလုံးပေါက်မိုးအလင်းပေါ့။
မနက်မိုးလင်းခါနီးမှာ သူခဏ အိပ်အုံးမယ် ဆိုပြီး.. အိပ်ပျော်သွားတယ်။ ခဏနေတော့ သူလန့်အော် ပြီး နိုးလာတယ်။ ဘာဖြစ်လို့လဲ သိလား။
.... အိပ်မက်ထဲမှာ သူ့အဖေက လာပြောတယ်..တဲ့။
သားရယ်..အဖေ့ကို ဒီလို ဦးသုံးကြိမ်ချပြီး ကန်တော့တဲ့အတွက် ကျေးဇူးတင်လိုက်တာ သားရယ်..။ အဖေ့မှာ အဖေ့ကို ဦးချနေတဲ့ သားကို ကြည့်ပြီး ဆုတွေ တသီကြီး ပေးမယ်လို့ အမြဲပဲ စိတ်ကူးခဲ့ရတာ။ ဒါပေမယ့် ကိုရင်ဝတ်တုန်းကရယ်..၊ ပဉ္ဇင်းတက်တုန်းကရယ်က လွဲရင် အခွင့်မကြုံခဲ့ဘူး။ အခုမှပဲ ငါ့သား ဦးချတာကို အဖေ့မှာ မြင်ရတော့တယ်။ ဒါပေမယ့် သားကြားအောင် အဖေ့မှာ ပြန်ပြီး ဆုပေးလို့ မရတော့ဘူး ။ ဒါကြောင့် အခု .. အဖေ ဆုပေးပါရစေ။ ငါ့သားလေး ကိုယ်စိတ်နှဖြာ ကျန်းမာချမ်းသာပါစေ၊ ရေလိုအေးလို့ ပန်းလိုမွှေးပါစေ၊ ဘေးမသီရန်မခ၊ မတောင့်မတ မကြောင့်မကျ.. စုံလို့ပေါ့.. ကွာ..၊ အိပ်မက်ထဲမှာ ဆုပေးတယ်တဲ့။ အန်ကယ့်သူငယ်ချင်းလဲ ယောက်ျားရင့်မာကြီးပေမယ့်.. ငိုပါလေရော..။
အဲဒါနဲ့ အန်ကယ်တို့ ပြန်မယ်လို့ ရည်ရွယ်ထားတဲ့ ရက်ကနေ နောက်ဆုတ်ပြီးမှ ရန်ကုန်ပြန်ရောက်ခဲ့တယ်။ အဲဒီတုန်းကတော့ ဂူသွင်းသဂြိုလ်တာမိုလို့ သူ့အဖေ့ရဲ့ အုတ်ဂူကို သူ့မှာ .. ကန်တော့ချင်လို့တဲ့လေ။ ပြန်မယ့်နေ့အထိ နေ့တိုင်းသွားပြီး ကန်တော့တယ်..။ဂူမှာ ထိုင်ပြီး စကားတွေလဲ ပြောတယ်.. ။ .. ..
အောင်ခန့်.. အန်ကယ်ပြောမယ်.. ။
မင်းမှာ .. ကိုယ်တိုင်ကိုယ်ကျ ကန်တော့ဖို့ အခွင့်ကြုံအုံးမှာပါ..။ နောက်မှတော့ နောင်တ မရစေချင်ဘူး။
ထိုင်ကန်တော့ဖို့ မိဘ တွေ သက်ရှိထင်ရှား ရှိတယ် ဆိုတာလောက် ကံကောင်းတာ မရှိဘူး..အောင်ခန့်။
တစ်နှစ်မှာ ဦးသုံးကြိမ်တော့ ကိုယ်တိုင်ကိုယ်ကျ ချဖြစ်အောင် ချနိုင်ဖို့ ကြိုးစားပါ။ တစ်နှစ်လုံးမှာမှ ဦးသုံးကြိမ်နော်။ တစ်မိနစ်မကြာပါဘူးကွာ...။
.... ငွေနောက် အသည်းအသန် မလိုက်ချင်ပါနဲ့။ ပိုက်ဆံထက် အရေးကြီးတာတွေ လောကကြီးမှာ အများကြီးရှိတယ်..။ တစ်နှစ်ကို တစ်လခွင့်မပြန်လို့ အဲဒီ့လအတွက် နှစ်လစာ ပေးတာတောင် အန်ကယ် မယူနိုင်ဘူး။ အန်ကယ့်မှာ မိဘ သက်ရှိထင်ရှားရှိသေးတယ်။ အန်ကယ် ခွင့်ပြန်တိုင်း မိဘနှစ်ပါးဆီ ရောက်အောင်သွားဖြစ်တယ်..။ ကိုယ်တိုင်ကိုယ်ကျ လက်အုပ်ချီပြီး အမှားရှိရင် ခွင့်လွှတ်ဖို့ ကန်တော့တယ်။ ..
.. အခု အန်ကယ်ပြောတာတွေကို မင့်အမြင်မှာတော့ ဒီလူကြီး လာပွားနေတာပဲ ဆိုပြီး .. မင်းတို့လူငယ်တွေ ပြောနေကြစကားနဲ့ မပြောစေချင်ဘူး။ ..အခု အန်ကယ်ပြောတာတွေက .....
မင်း..မင်း မိဘ..မင်း အဖေပေါ့လေ.. သူ့ဆီကို ကန်တော့တဲ့အနေနဲ့ လခ ပို့ပေးရုံနဲ့ မင့်တာဝန်ကျေပြီ လို့ မှတ်နေမှာ စိုးလို့ပါ..
တာဝန်ကျေတဲ့သားတစ်ယောက်ဆိုတာထက် သိတတ်လိမ္မာတဲ့ သားတစ်ယောက်ဖြစ်စေချင်တယ်။
သူများပြောမှ သိရတယ် ဆိုတာထက် .. ကိုယ့်အသိစိတ်နဲ့ကိုယ် သိတတ်တာ အကောင်းဆုံးပဲ။
ကဲ .. ရန်ကုန်ခွင့်ပြန်မယ့်လူကြုံရှိရင် အန်ကယ် မင်းကို ကြိုပြောမယ်..။ စာလေးဘာလေး ရေးထားပေါ့.. ။ ဟုတ်ပြီလား.. ။”
(အခန်း - ၇)
ဆောင်းဦး မြောက်လေတိုက်၍ အေးခိုက်နေသော အချိန်တွင် စာရေးခဲလှသော အဖေ့ဆီမှ စာလာသောကြောင့် ကျွန်တော်သည် နွေးနွေးထွေးထွေးလေး ခံစားလိုက်ရသည်။
သား
အဖေ ဒီနှစ် သီတင်းကျွတ် ခြံထဲမှာ သား ကိုယ်စား ကျင်း ၂၇ကျင်း တူးပြီး ဘုရားကိုမီးပူဇော်တယ် သား..။ အဖေ့ကို ဘေးအိမ်က ကြည့်ပြီးတော့တောင် ရီနေကြတယ်..။ အဖေ ဒီလိုလုပ်တာ ဒီနှစ်နဲ့ဆို သုံးနှစ်ရှိပြီ။ သားကို မပြောဖြစ်တာပါ။ ကျင်းတူးဖို့နေရာရဖို့အတွက် အဖေ့ပန်းအိုးတွေကို ခြံနောက်ဘက်ကို ရွှေ့ထားလိုက်တယ်..။ သား အသက်ကြီးလာတာနဲ့ အမျှ အဖေ့နေရာတွေကို သားကို ပေးရမှာပါလားလို့ အဖေ ဆင်ခြင်မိတယ်။ သားလဲ အဖေ့နေရာ ရောက်လာရင် သားနဲ့ပတ်သတ်ပြီး အဖေ ဘယ်လိုတွေးတယ် ဆိုတာ သား..သိလာမှာပါ။
သား.. ကျင်းလေးတွေတူးနေတဲ့ မြင်ကွင်းကို အဖေ နှစ်တိုင်း မြင်ယောင်ကြည့်နေရတယ်..သား။ သား ဒီတခါ သီတင်းကျွတ် ပြန်လာလို့ ကျင်းတူးပြီး မီးပူဇော်ရင် ဟိုးအရင်တုန်းကလို သားကို အဖေ ဆူဖြစ်မှာ မဟုတ်ဘူး။ နောက်နှစ်ကျရင်တော့ သီတင်းကျွတ်ကို မဖြစ်မနေ ခွင့်နဲ့ ပြန်လာစေချင်တယ်.. သားရယ်..။
လာမယ့်နှစ်မှာ အဖေ့ကို နှစ်တိုင်းကန်တော့နေသလို ပိုက်ဆံနဲ့ လှမ်းပြီး ကန်တော့ဖို့ စိတ်မကူးပါနဲ့။ ဘာမှ မဟုတ်တာလေးနဲ့ သား စိတ်ညစ်မှာစိုးလို့ အဖေ မပြောဘူးလို့နေတာပဲ.. ဒါပေမယ့် ပြောရတော့မယ်။ အဖေလဲ အသက်ကြီးပြီ။.. အဖေ .. သားနဲ့တွေ့ချင်တာပါ။ အဖေ့အတွက် ပိုက်ဆံတွေ မလိုပါဘူး။ သားနဲ့ မျက်နှာချင်းဆိုင်ထိုင်ပြီး စကားပြောချင်တာပဲ ရှိတယ်။
ငါ့သား..ရွှင်လန်းချမ်းမြေ့ပါစေ။
အဖေ
(အခန်း - ၈)
အဖေ့ဆီ ဖုန်းခေါ်မည်။ ကျွန်တော်တို့ အလုပ်တွင် လုပ်သက်တစ်နှစ်ပြည့်လျှင် ခွင့်တစ်လ ယူခွင့်ရှိသည်။ သို့သော် ထိုခွင့်ယူရမည့် လအတွက် ခွင့်မယူတော့ဘဲ အလုပ်ဆင်းလျှင် ထိုလအတွက် လစာ နှစ်လစာ ရသည်။ ထိုအပိုရသော လစာဖြင့် ကျွန်တော်သည် laptop လဲရန်၊ mobile လဲရန်၊ installment ဖြင့် ကားဝယ်ရန် စသည်ဖြင့် ရုပ်ဝတ္ထုလိုအပ်ချက်များကိုသာ ဖြည့်ဆည်းရန် အမြဲစဉ်းစားနေခဲ့မိသည်။ သို့သော် လာမည့်နှစ် အောက်တိုဘာလတွင် ကျွန်တော် ခွင့်ယူချင်သည်။ ခွင့်အတွက် စိတ်ချရအောင် အလုပ်ရှင်အား ယခုထဲက ကြိုတင်၍ ခွင့်စာတင်ထားမည်။
(အခန်း - ၉)
နောင်တ ဆိုသော အရာကို ကျွန်တော် သိပ်ကြောက်သည်ပဲလေ။ ။
ပန်းနွယ် (၂၀၀၄)
